VOV4.Jarai - Ƀrô tal hơdor glăi 80 thun hrơi gru grua pioh hơdor mơnuih tha rơman Việt Nam (6/6), tlam lơ 4/6, Khua Jơnum min mơnuih ƀon sang tơring čar Dak Nông hơmâo nao čuă jơmư, ƀơk bơnga hăng pơpŭ ƀing mơnuih tha rơma amăng tơring čar Dak Nông. Jơnum min mơnuih ƀon sang tơring čar lăng yôm hơdôm tơlơi gum pơgôp mơng ƀing mơnuih apăn bruă, ding kơna khul mơnuih tha rơma amăng thun blan laih rơgao, ƀu djơ̆ kơnong ba gru hiam brơi kơ ană tơčô hrăm tui amăng djop mơta bruă đôč ôh mơ̆ ăt gum pơgôp brơi tơring čar jai hrơi pơđĭ kyar. Khua Jơnum min mơnuih ƀon sang tơring čar čang rơmang ƀing apăn bruă, ding kơna Khul mơnuih tha rơma hiam drơi jăn na nao, tŏ tui djru brơi tơring čar, biă mă ñu amăng mut hrŏm amăng bruă “Mơnuih thun tha thâo rơgơi, ba jơlan pơčeh phrâo djru pơjing hăng wai pơgang lŏn ia”. Amăng mông bưp, khua khul mơnuih tha rơma tơring čar pơpŭ bơni tơlơi đing nao mơng khua mua tơring čar. Khul mơnuih tha rơma amra tŏ tui gum hrŏm hăng tơring čar amăng bruă pơplông khăp kơ lŏn ia, biă mă ñu lĕ pơtô, črâo ba ƀing ană tơčô.

Siu Đoan: Pơblang