VOV4.Jarai - Mơguah lơ 14/5, ƀơi tơring glông Củ Chi, ƀôn prong Hồ Chí Minh, Khua mir sir dêh čar ta ơi Nguyễn Xuân Phúc hăng ƀing mơnuih tơbiă anăn kơ Khua pơ ala mơnuih ƀôn sang dêh čar tal 15 bưp mơnuih ruah khua tui hơdră lăng nao rai amăng tivi. Pơhiăp amăng mông bưp, Khua mir sir dêh čar ta ơi Nguyễn Xuân Phúc lăi rơđah: Tơdah jing khua pơ ala mơnuih ƀôn sang dêh čar thơ blung hlâo khom hmư̆ tơlơi pơmin, tơlơi čang rơmang mơng mơnuih ruah khua lăi nao hmao tlôn truh kơ Khua pơ ala mơnuih ƀôn sang dêh čar, Ping gah, Kơnuk kơna, ƀirô apăn bruă pơsir hơdôm tơlơi rơkâo đĭ, hơdôm tơlơi gum pơhiăp lăp djơ̆ mơng mơnuih ruah khua ƀơi anih pô tơbiă anăn dô̆.

Khua mir sir dêh čar ta brơi thâo, amra gơgrong hlâo klă tơlơi gum hơgô̆p pơđĭ tui bôh tơhnal bruă mă mơng grŭp khua pơ ala mơnuih ƀôn sang ƀôn prong Hồ Chí Minh, grŭp prong hloh đơ đam dêh čar ta. Khua mir sir dêh čar ta ơi Nguyễn Xuân Phúc đing nao truh pok pơhai 4 jơlan hơdră pơđĭ kyar ƀôn prong Hồ Chí Minh hmâo ba tơbiă, amăng anun bruă pơđĭ tui anô̆ kơjăp hơdôm kual ia dŏng, ayuh hyiăng ngă hăng pơđĭ tui bôh thâo bơkơtưn mơng ƀôn prong, pơhlôm anih anom dô̆ mơtah, pơhlôm hơđong. Abih bang ƀing khua pơ ala mơnuih ƀôn sang dêh čar mơng ƀôn prong lăi hrom khom hmâo bruă gơgrong pơdŏng ƀôn prong Hồ Chí Minh thâo rơgơi – pơplih phrâo – thâo tơngia, pơdŏng gru grua bôh thâo./.

Siu H’ Prăk: Pô pơblang