VOV4.Jarai - Lơ 30/5, Khua mir sir dêh čar ta ơi Nguyễn Xuân Phúc hmâo hră mơ-ĭt kơ  rơkâo Khua mir sir dêh čar Mi ơi Joe Biden kiăng bơkơtuai kơ tơlơi rô nao rai dua bôh dêh čar, biă ñu kơtưn gum hrom amăng bruă bŏng klă klin Covid-19. Amăng hră, Khua mir sir dêh čar ta bơni kơ Mi hmâo gum djru prong lom pơkôl djru 4 klai dolar Mi kơ tơlơi pơčeh phrâo bruă đơ đam rŏng lŏn tơnah dưi hmâo vaccine pơgang Covid-19 (COVAX) hăng lăi pơthâo hăng Khua mir sir ơi Joe Biden bruă Việt Nam hmâo čơkă mă 2 tal vaccine hăng năng ai ñu 2 klăk liều mơng tơlơi pơčeh anai.

Khua mir sir dêh čar ta ơi Nguyễn Xuân Phúc čang rơmang Mi djru dong kơ Việt Nam hăng hơdôm bôh dêh čar vaccine pơgang klin, hrom hăng anun rơkâo dua bơnah kơtưn gum hrom kơsem min, pơkra hăng pơtô glăi hơdră pơkra vaccine pơgang Covid-19. Khua mir sir dêh čar ta pơsit, Việt Nam lăng yôm bruă gum hrom abih bang hăng Mi hăng đăo gơnang lĕ hăng pran jua gum hrom giăng mah, dua bơnah amra pơtrut dong tơlơi rô nao rai dua bơnah jai hrơi mut dơlăm hloh, sit nik hloh, ba glăi bôh tŭ yua kơ mơnuih ƀôn sang dua bôh dêh čar, djru amăng bruă djă pioh tơlơi rơnuk rơnua, hơđong, gum hrom hăng pơđĭ kyar ƀơi kual hăng ƀơi rŏng lŏn tơnah./.

Siu H’ Prăk: Pô pơblang