VOV4.Jarai-Mơguah lơ 23/3, ƀơi Sang jơnum prong dêh čar Mỹ Đình, Hà Nội, Khua mua apăn bruă git gai Khul tơdăm dra mut phung dêh čar jơnum prong biă mă hơdor glăi 90 thun Hrơi akŏ pơjing Khul tơdăm dra mut phung rơnuk Hồ Chí Minh lơ 26/3/1931-lơ 26/3/2021 hăng čơkă mă miđai anăn Hồ Chí Minh.

Khua git gai ping gah, khua mir sir ơi Nguyễn Phú Trọng; Khua dêh čar ơi Nguyễn Xuân Phúc hăng ƀing khua mua amăng kơnuk kơna, khua mua hơđăp Ping gah,

kơnuk kơna nao jơnum hrŏm

Khua git gai ping gah, Khua mir sir ơi Nguyễn Phú Trọng nao jơnum hrŏm hăng đĭ pơhiăp ƀơi mông jơnum. Lăng glăi sa črăn jơlan găn rơgao 90 thun akŏ pơjing hăng đĭ prong amăng bruă hơkrŭ hing ang mơ̆ng Ping gah, mơ̆ng djuai ania, Khul tơdăm dra mut phung rơnuk Hồ Chí Minh hăng Hlăk ai Việt Nam hơmâo pơdah rai pran jua khăp kơ lŏn ia prong prin, tong ten hăng đăo kơnang sit nik kơ tơlơi git gai mơ̆ng Ping gah, đăo kơnang tơhnal pơtrun kiăng rơngai kơ djuai ania hăng jơlan hơdră mơnuih mơnam ngă khua pô.

Khul tơdăm dra mut phung rơnuk HCM lăp hăng anăn grup prăp lui, lăp đăo kơnang mơ̆ng Ping gah, kah hăng sang hră mơnuih mơnam ngă khua pô, anom bruă jing asar, aliăng kjăp bruă kơđi čar mơ̆ng hlăk ai Việt Nam. Pơhiăp ƀơi mông jơnum hơdor glăi, Khua git gai ping gah, khua mir sir, ơi Nguyễn Phú Trọng lăi pơtong, kiăng tañ pok pơhai bruă hrăm, pơtô lăi tong ten, pôr pơthâo hăng ngă rơđah tui Hră pơtrun mơ̆ng jơnum ruah khua ping gah dêh čar tal XIII, jing jơlan hơdră pioh pơtrun mă bruă prong kơ Hlăk ai, khul tơdăm dra mut phung, lăng anai kah hăng jrum hñueng pơčrâo brơi jơlan gleng nao pơ anăp pioh pok pơhai bruă mă mơ̆ng Khul tơdăm dra mut phung hăng bruă mă pơtô khul tơdăm ngek dra muai čhăng čơđai muai anet hai.

Nay Jek: Pơblang