VOV4.Jarai-Tlam lơ 28/5, Kơ-iăng Khua dêh čar ơi Vũ Đức Đam, Khua git gai khul mơ̆ng dêh čar pơgang Covid 19 hơmâo jơnum lăng nao rai amăng tivi, hmư̆ lăi pơthâo tơlơi pơhing pơgang klin Covid 19 mơ̆ng dua boh tơring čar Bắc Giang hăng Bắc Ninh, hơmâo pok pơhai mă ia khak ba pơčrang kman amăng kual hơmâo klin hăng hơdôm anih aka ƀu guang dar mơnuih mơnam; kơtưn ĕp lăng ƀing mơnuih pơtŭk, duăm pơ-iă drơi.

Ƀơi Bắc Ninh, tơdơi kơ ƀuh mơnuih ƀă kman amăng anih tuh tia pơkra pơjing Khắc Niệm, tơring čar Bắc Ninh pok pơhai khut khăt, ngă tui lu hơdră, mă ia khak, ia mơdung ba pơčrang kman, rơbêh 30 rơbâo tơhnal ia khak ia bah arăng mă ba pơčrang.

Ƀơi mông jơnum, Kơ-iăng khua dêh čar ơi Vũ Đức Đam rơkâo, tơring čar Bắc Ninh hăng Bắc Giang ăt pơtum brơi mă ia khak, ia bah ba pơčrang kiăng thâo tong ten klin kheng, pơgang rơnuk rơnua hơđong kual tuh tia pơkra pơjing.

Nay Jek: Pơblang