VOV4.Jarai - Mơguah lơ 1/6, Ding jum khul ling tơhan hơmâo pơphun jơnum lăng nao rai ămng tivi pok pơhai bruă mă, hơdră pơgang ječ ameč hăng klin Covid-19 amăng khul ling tơhan pơ 187 anih. Klin tal 4 anai, khul ling tơhan hơmâo pơđĭ tui  rơbêh 1.000 čô tơhan djru ba anih hơmâo klin kơtang anun lĕ Bắc Ninh hăng Bắc Giang, amăng anun mrô mơnuih pơčrang kman hăng 43 grup mă drah, ia khak ia adung hơmâo ba nao djru. Ăt ƀơi Bắc Ninh, Bắc Giang mơn, Ding jum khul ling tơhan hơmâo pơdong jăng jai 3 boh sang ia jrao pioh pơjrao brơi ƀing ƀă kman Covid-19, hơmâo čơkă pơjrao brơi 641 čô mơnuih. Mơng akŏ thun truh ră anai, hơdôm puih kơđông tơhan, Anom git gai tơhan hơdôm tơring čar, ƀon prong ăt pok pơhai hơdră pơgang klin hăng djru ba hơdôm tơring pơgang klin. Ding jum khul ling tơhan ră anai glăk hơmâo 1.906 grup pơgăn mơnuih nao rai hăng rơbêh 12.800 čô mơnuih dŏ gak ƀơi guai, pơgăn arăng mut nao rai ča čot. Mơng akŏ blan 5 truh ră anai, hơdôm anih dŏ gak, wai lăng lăng jơlan guai hơmâo jao kơ gong gai brơi pơčlah giăm 5000 čô mơnuih, amăng anun hơmâo ƀuh rơbêh 1.800 čô mơnuih mut nao rai ča cot, lu biă ñu lĕ ƀơi guai dêh čar Kur hăng Khač.

Siu H’Mai: Pơblang