VOV4.Jarai - Tlam lơ 19/3, Kơ-iăng khua pơ ala mơnuih ƀon sang dêh čar ta Phùng Quốc Hiển, Ding kơna khul pơ pơphun plĕ hră ruah khua dêh čar hrŏm hăng ƀing khua mua pơkŏn hơmâo mông mă bruă hăng tơring čar Quảng Trị kơ bruă plĕ hră ruah khua pơ ala mơnuih ƀon sang dêh čar tal XV hăng Khua Khul pơ ala mơnuih ƀon sang djop gưl rơwang thun 2021-2026. Truh ră anai, Jơnum min mơnuih ƀon sang tơring čar Quảng Trị hơmâo akŏ pơjing 2 grup pơ pơphun plĕ hră ruah khua mua pơ ala mơnuih ƀon sang dêh čar hăng 16 anom bruă pơphun ruah khua pơ ala mơnuih ƀon sang tơring čar rơwang thun 2021-2026; akŏ pơjing 74 anom pơphun plĕ hră ruah khua pơ ala mơnuih ƀon sang tơring glông hăng 834 anom pưphun plĕ hră ruah khua khul pơ ala mơnuih ƀon sang gưl să.

Bruă pơ pơčrông sai, lăi pơthâo mơnuih amra ruah djơ̆ hăng tơlơi pơkă, djơ̆ hăng arăng dưm dăp  hăng pơhlôm djơ̆ tơlơi phiăn. Truh ră anai, Jơnum min djop djuai ania mơnuih mơnam Việt Nam tơring čar Quảng Trị hơmâo pơgiong jơnum pơčrông sai tal 2 tŭ ư anăn mrô khua 9 čô amra ruah ngă khua pơ ala mơnuih ƀon sang tal XV ƀơi ƀon lan, 90 čô khua mua ruah ngă khua pơ ala mơnuh ƀon sang tơring čar rơwang thun 2021-2026. Kơ-iăng khua pơ ala mơnuih ƀon sang dêh čar ơi Phùng Quốc Hiển rơkâo tơring čar Quảng Trị čih anăn jang jai ƀing khua mua amra ruah kiăng kơ pơhlôm djop. Pơjing hơdră bruă lăp djơ̆ hăng lu tơlơi tơnap amra hơmâo anun lĕ ayuh hyiăng ƀu klă ngă, klin Covid-19 ... mơng hrơi anai truh hrơi plĕ hră.

Siu Đoan: Pơblang