VOV4.Jarai - Mơguah lơ 16/3, Kơ-iăng khua dêh čar ta, Khua ding jum pơtom hiăp dêh čar ta ơi Phạm Bình Minh pơhiăp telephôn hăng Khua ding jum pơtom hiăp dêh čar Cuba ơi Bruno Rodriguez Parrilla kiăng kơ pơcrông sai kơ hơdră bruă, jơlan gah kơtưn rô nao rai, ngă hrŏm dua bơnah. Amăng mông pơhiăp telephôn, Kơ-iăng khua dêh čar ta, Khua ding jum pơtom hiăp dêh čar ta ơi Phạm Bình Minh lăi pơtong tơlơi pơmĭn kjăp mơng dêh čar Việt Nam lêng kơ ha pran gum pơgôp hăng dong yua dêh čar Cuba.

Khua ding jum ơi Bruno ăt brơi thâo dêh čar Cuba lêng kơ lăng yôm hăng čang rơmang ngă tơlơi rô nao rai giang mah dua bơnah jai hrơi kjăp phik hăng ngă hrŏm djop mơta hăng dêh čar Việt Nam, laih dong lăng yôm hơdôm tơlơi gir run mơng Việt Nam amăng bruă pơgang klin Covid-19, laih dong pơhlôm hơđong amăng pơđĭ kyar tơlơi bơwih ƀong huă. Dua čô khua ding jum pơdah tơlơi gơgrong lơm ngă tui hơdôm tơlơi ƀuăn kiăng kơ ngă kjăp dong tơlơi rô nao rai, gum pơgôp, giang mah hăng ngă hrŏm djop mơta kơplah wah Việt Nam - Cuba, pok pơhai tŭ yua jơlan hơdră bruă mă mơng dua bơnah amăng thun 2021 anai.

Siu Đoan: Pơblang