VOV4.Jarai - Tlam tom brơi lơ 4/6, ƀơi Ƀirô Kơnuk kơna, Kơ-iăng khua dêh čar ta ơi Vũ Đức Đam, Khua Khul git gai dêh čar kơ bruă pơgang klin Covid-19 jơnum lăng nao rai amăng tivi hăng khua mua tơring čar Bắc Ninh hăng Bắc Giang kơ hơdră pơgang klin Covid-19 amăng ră anai. Lăi pơtong kơ bruă sa, dua boh anih pơčlah, guang dar, ƀut plơi pla gah rơngiao kjăp, amăng lăm pơtah tai, Kơ-iăng khua dêh čar ta ơi Vũ Đức Đam rơkâo, hơdôm tơring čar kiăng kơ pơsir hĭ khut khăt bruă anai. Hrŏm hăng anun, kiăng tŏ tui wai lăng kjăp, pơlir hăng bruă mă ia khak, ia adung tui hluai pô ƀơi hơdôm kual, mă yua plang internet kiăng kơ phaih gah ia jrao. Hơdôm hrơi laih rơgao, mơng plang internet, hơmâo ĕp ƀuh rơbêh 500 čô mơnuih him lăng ƀă klin mơng anun amra mă ia khak, ia adung pơčrang lăng. Kơ-iăng khua dêh car ta ơi Vũ Đức Đam brơi thâo, tơring čar Bắc Ninh hăng Bắc Giang kiăng ba tơbiă hơdră brơi kơ mơnuih mă bruă laih dong anih dŏ hơdip ƀơi sang măi, anai lĕ hơdôm hơdră jang jai, kiăng kơ tañ hơmâo hơdră mă yua sui hrơi pơ anăp.

Siu Đoan: Pơblang