VOV4.Jarai - Mơguah lơ 26/3, ƀơi Anom pơtô bruă ia jrao ling tơhan (Ding jum Khul ling tơhan dêh čar ta), Kơ-iăng Khua dêh čar ta ơi Vũ Đức Đam, Khua Grŭp črâo bruă pơgang, pơgăn klin Covid-19 nao čuă hăng pơtrut pơsur khul mơnuih gum hrom kơsem min hăng ƀing pơyơr drơi lông lăng tlâ̆o ară tal 2 vaccine Nano Covax. Tui hăng Nai tha prin, nai prin tha Đỗ Quyết, Khua Anom pơtô bruă ia jrao ling tơhan, truh ră anai, hrơi blan kơsem min, pơkra vaccine Nano Covax ƀiă truh rơnoh dưi ñu samơ̆ ăt pơhlôm brơi mơn anô̆ pơhlôm kiăng tơhnal pơkă tañ hmâo vaccine pơhlôm ba glăi bôh tŭ yua kơ mơnuih Việt Nam. Tal tlâ̆o pơgang lông lăng anai hmâo 560 čô mơnuih rơkâo, pơhư lu tui mơnuih mơng 18 truh rơbêh kơ 60 thun, amăng anun sa dua čô mơnuih hmâo tơlơi ruă pơkon ƀu kraih đơi. Tal 3 amra lông lăng rơbêh kơ 10 rơbâo čô mơnuih, mơng anun, hmâo anih anom kơsem min kiăng bơhmu tu nao kiăng Việt Nam amra hmâo bôh than tañ vaccine, pơkă lăng hlâo amăng blan 9 thun anai./.

Siu H’ Prăk: Pô pơblang