VOV4.Jarai - Mơguah lơ 26/3, ƀơi plơi prong Kontum, Khul hlăk ai Cộng sản Hồ Chí Minh tơring čar Kontum ngă lơphet hơdor glăi 90 thun hrơi pơdŏng Khul hlăk ai Cộng sản Hồ Chí Minh pơkĕ hăng hơdor glăi 70 thun hrơi Wa Hồ ƀơk tơlơi pơtưh hlăk ai prong pran săn hơtai hăng bơni khul, mơnuih mơbruă thun 2021.

Amăng mông ngă Lơphet hơdor glăi ƀing pơ ala hrom hăng rơbêh kơ 400 čô mơnuih hlăk ai, tơdăm dra tơring čar Kontum hmâo lok glăi gru grua ư-ang 90 thun pơdŏng hăng pơjing mơng Khul hlăk ai Cộng sản Hồ Chí Minh; bơni 14 čô mơnuih hlăk ai mơbruă; 90 grŭp hlăk ai, khul hlăk ai kơtang.

Tal anai hmâo 11 grŭp mơbruă hloh amăng bruă khul hăng bruă tơdăm ngek dra muai čơđai muai mơng tơring čar Kontum mơng thun 2016-2020 ư-ang čơkă Hră Bơni mơng Khul hlăk ai dêh čar ta; 10 čô mơnuih čơkă mă Kỷ niệm chương Yua kơ rơnuk hlăk ai; 2 čô mơnuih hmâo mă Kỷ niệm chương Hlăk ai prong pran săn hơtai hơđăp./.   

Siu H’ Prăk: Pô pơblang