VOV4.Jarai - Tlam lơ 25/3, ƀơi Ƀirô Kơnuk kơna, Khua dêh čar ta ơi Nguyễn Xuân Phúc git gai mông bưp kiăng kơ lăng glăi bruă mă mơng Kơnuk kơna rơwang thun 2016-2021. Đĭ pơhiăp amăng mông bưp, Khua dêh čar ta ơi Nguyễn Xuân Phúc lăi pơtong, 5 thun laih rơgao lĕ rơwang mă bruă hăng lu tơlơi yôm phiăn, lĕ thun blan hơmâo lu tơlơi ba glăi hăng kơnong Khua dêh čar laih dong ƀing ding kơna amăng Kơnuk kơna. Kơnuk kơna hơmâo tŭ ư, ha pran gum hrŏm găn rơgao tơnap tap.

Ƀing khua mua amăng Kơnuk kơna pơ-ư pơ-ang hăng gir run abih pran jua kiăng pơgôp pơđĭ kyar lŏn ia, djru brơi mơnuih ƀon sang. Pơdah pran gir run hrŏm mơ̆ ƀu hơmâo khua mua pơpă ôh pơtah tai mă bruă amăng 5 thun laih rơgao, Khua dêh čar ta pơpŭ bơni abih bang khua mua amăng Kơnuk kơna ta, djop anom bruă lêng kơ gum hrŏm, dong yua Khua dêh čar ta ngă pơgiong bruă jao mơng Ping gah hăng Kơnuk kơna. Khua dêh čar ta čang rơmang khua mua amăng Kơnuk kơna ta, pơ anăp anai mah ngă bruă hơget ƀudah pơdơi bruă thun tha ăt djă pioh na nao pran ngă hơkrŭ, gum pơgôp brơi Ping gah, mơnuih ƀon sang, kiăng kơ ba lŏn ia Việt Nam hrưn đĭ pơdrong asah, hiam klă.

Siu Đoan: Pơblang