VOV4.Jarai-Tlam lơ 2/3, ƀơi Hà Nôị, Khua mua git gai phun Jơnum min wai lăng djop djuai ania mơnuih mơnam Việt Nam, jơnum sit nik mă hiăp pơgôp mơ̆ng mơnuih ƀôn sang anih dŏ kơ pô dưi lăi pơthâo anăn pioh ruah ngă pô pơ ala dêh čar tal 15.

Hăng bruă ngă tơpă, tơlơi dưi pô, mơnuih ƀôn sang amăng anih dŏ hăng anom bruă Jơnum min wai lăng djop djuai ania mơnuih mơnam Việt Nam tŭ ư lăi pơthâo ơi Trần Thanh Mẫn hăng ơi Hầu A Lềnh tơbiă anăn pioh ruah ngă pô pơ ala mơnuih ƀôn sang dêh čar tal 15.

Mơ̆ng tơlơi pơgôp hiăp djop mơnuih nao jơnum, Kơ-iăng Khua Jơnum min wai lăng djop djuai ania mơnuih mơnam Việt Nam, ơi Nguyễn Hữu Dũng lăi pơtong, dua čô khua pơ ala lêng kơ lăp soh, pioh tơbiă anăn ruah ngă pô pơ ala mơnuih ƀôn sang dêh čar hăng djơ̆ tui tơlơi pơtrun mơ̆ng ping gah hăng tơlơi phiăn kơnuk kơna.

Anai lĕ hơdôm čô khua pơprong ping gah, gơñu găn rơgao lu amăng tơlơi hơdip mơda laih anun tom ngă khua lu anom bruă, anih hơdip jum dar, anŏ mă bruă phara soh samơ̆ tŭ mă tơlơi dong yua lu mơ̆ng mơnuih ƀôn sang, ƀing ngă bruă hrom.

Nay Jek: Pơblang