VOV4.Jarai - Hăng mrô ia dưi hơmâo amăng dơnai lĕ 3,2 klăk m3, pioh prui kơ 600 ektar añăm pơtăm, pơdai kơtơr, dơnao ia Proh ƀơi să Pró, tơring glông Đơn Dương (Lâm Đồng) dong ƀơi anăp tơlơi truh sat amăng bơyan hơjan hlim yua hơmâo arăng ngă răm kơtang.

Bơnư̆ kŏng ia Proh, să Pró, tơring glông Đơn Dương (Lâm Đồng) glăk răm kơtang yua hơmâo pô ngă. Jơlan điăo nao hăng ngŏ bơnư̆ kŏng ia pơčrah laih, jing glông ia dlăm yua lu rơdêh prong đuăi nao rai pơdŭ čuah, lŏn. Hrŏm hăng anun, lŏn čuah kŏng glăi amăng dơnao, arăng tuh lŏn gô̆ mă dơnao ia ăt hơmâo ƀơi lu anih mơn, ngă ƀơi akiăng dơnao ia ƀu rơnuk rơnua dong tah, hŭi pơčah biă mă. Abih bang bruă anai hơmâo sui laih, samơ̆ gong gai hăng anom apăn bruă aka ƀu hơmâo tơlơi lăi glăi, pơsir brơi ôh, djơ̆ anŏ ñu pơsir ƀu truh tơhnal ôh.

Ơi Đỗ Phú Hòa, mơnuih mă bruă amăng Anom wai lăng - mă yua ia Đơn Dương, pô wai lăng dơnao ia Proh brơi thâo, rim wơ̆t ƀuh arăng ngă răm dơnao ia lĕ anom bruă lêng čih hră hăng rơkâo gong gai să pơsir brơi. Khă hnun, lu wơ̆t gơñu pioh lui hnun đôč, pơsir mă ƀơ ƀiă, ƀu truh tơhnal ôh, jing bruă arăng ngă răm, gô̆ mă lŏn ƀơi dơnao ia Proh jao hrơi kơtang tui, ƀu anăm wai lăng dong tah. Ơi Đỗ Phú Hòa lăi pơthâo, ră anai hơmâo aset hloh lĕ 35 boh sang anŏ gô̆ mă lŏn kơtuai akiăng dơnao ia:

“Lăng nao abih bang amăng bruă wai lăng dơnao ia, bruă anai bơdjơ̆ nao lu tơlơi biă. Tơdah hơmâo laih tơlơi ngă soh mơ ƀing ta ƀu pơsir đut tơhnal lĕ amra jing ngă soh sui thun yun blan, jai hrơi kơtang tui. Ră anai, lŏn tơnah pơmă tui, bruă arăng ngă soh ăt hơmâo na nao mơn. Tơdah hơmâo pơsir khut khăt lĕ amra hơmâo pô ngă soh dong mơn, tơnap biă amăng bruă wai lăng hăng pơgang ba dơnao ia”.

Ană plơi tŭ kơ ba nao rơdêh čuk čuk dor lŏn, gô̆ mă lŏn ƀơi ter dơnao kŏng ia Proh.

Hmư̆ hing hloh kơ bruă pơsir ƀu truh tơhnal mơng gong gai să Pró lĕ bruă arăng gô̆ mă lŏn ƀơi dơnao ia Proh amăng lơ 11/4/2021. Lơ̆m ƀuh ơi Nguyễn Xuân Hải, dŏ ƀơi tơring kual Thạnh Mỹ, tơring glông Đơn Dương tŭ kơ ba nao rơdêh čuk nao čuk pơkra lŏn, gô̆ mă lŏn pioh ngă dơnao ia, Anom wai lăng - mă yua ia Đơn Dương hơmâo pơgăn laih, kiăng Jơnum min mơnuih ƀon sang să Pró ngă hră hăng đŭ prăk. Khă hnun truh ră anai, rơngiao kơ 200 rơbâo prăk arăng đŭ, pô anai ăt aka ƀu pơsir ƀơ̆i kual lŏn ñu čuk anun, aka ƀu ba glăi lŏn ñu sua mă ôh. Lăi nao tơlơi kaih ba glăi, ơi Châu Văn Kỳ, Khua Jơnum min mơnuih ƀon sang să Pró pơsit, ƀu djơ̆ gơñu pơgang ba, ƀu dah ngă amưng hơget ôh. Yua ñu phrâo ngă bruă 2 blan anai đôč, yua hnun hơdôm bruă anai ñu dŏ sư̆ rơbư̆ aka ƀu thâo rơđah lơi. Ñu lăi amra tañ pơsir đut tơhnal hlao bruă anai amăng hrơi blan pơ anăp.

“Yua hơmâo bơnư̆ kŏng ia anai mơn mơng hơmâo ia pruih mơng să anai nao pơ să adih, yua anun kiăng răk rem biă, samơ̆ tơlơi tơnap hloh ră anai lĕ ngă hiư̆m pă mơng ƀuh hăng pơsir hlao mơng hrơi blung a mơtăm, yua dah pô anai dưi gô̆ mă lĕ pô adih dưi mơn gô̆ mă. Yua hnun bruă pơsir pơ anăp lĕ, tơdah pô anai ngă soh dong mơn amra bơtơhmal kơtang đôč yơh”.

Ƀơi anăp ring bruă dơnao kŏng ia Proh hơmâo arăng ngă răm, Anom bruă wai lăng - mă yua ia Đơn Dương hơmâo lu wơ̆t laih rơkâo anom apăn bruă djru pơgăn hĭ rơdêh prong nao rai jơlan ƀơi bơnư̆ anai. Laih dong, rơkâo gong gai pơsir klă ƀiă bruă arăng ngă soh, ngă răm dơnao kŏng ia, gô̆ mă lŏn ƀơi tơkai bơnư̆. Yua dah bruă anai pioh lui sui amra bơbeč kơtang kơ bruă pơđoh ia, laih anun amuñ hơmâo tơlơi truh sat ƀơi dơnao ia amăng bơyan hơjan pơ anăp anai.

Quang Sáng: Čih - Siu H’Mai: Pơblang