VOV4.Jarai - Khua git gai Ping gah tơring čar Lâm Đồng ơi Trần Đức Quận hơmâo git gai jơnum apăn bruă khua Ping gah tơring čar tal XI pơgôp hiăp kơ bruă ruah mơnuih apăn bruă ba nao ruah ngă Khua mua pơ ala mơnuih ƀon sang tal 15 hăng Khua Khul pơ ala mơnuih ƀon sang tơring čar rơwang thun 2021-2026 hăng sa, dua bruă yôm phun pơkŏn.

Amăng mông jơnum anai, Khul apăn bruă Ping gah tơring čar hơmâo pơgôp hiăp bơdjơ̆ nao hơdôm boh tơhnal: Bruă ruah mơnuih apăn bruă ba nao ruah ngă khua mua pơ ala mơnuih ƀon sang tal 15 hăng khua khul pơ ala mơnuih ƀon sang rơwang thun 2021-2026 tui tơlơi pơsit mrô 09 mơng Jơnum min apăn bruă Khua pơ ala mơnuih ƀon sang - Kơnuk kơna - Jơnum min djop djuai ania mơnuih mơnam Việt Nam; Hơdră tuh pơ alin man pơkra jơlan rơdêh đuăi hmar Tân Phú - Bảo Lộc; bruă jao hơnong pơkă rơnoh pơhrui ngăn drăp kơnuk kơna thun 2021 brơi hơdôm ring bruă, akŏ bruă amăng tơring čar; akŏ bruă pla phun makka ƀơi tơring glông Đam Rông hăng bruă dưm dăp, mă glăi lŏn ƀơi ƀon lan tui tơlơi pơkă mơng gơnong dlông.

Siu Đoan: Pơblang