VOV4.Jarai - Mơguah lơ 26/3, Jơnum min pơ ala mơnuih ƀôn sang tơring čar Lâm Đồng tal 9 hmâo pok pơhai Tal jơnum lok 18 kiăng pel ĕp lăng glăi hơdôm tơlơi pơtrun pơsit yôm phăn gah pơđĭ kyar bơwih ƀong – mơnuih mơnam mơng tơring čar.

Amăng tal jơnum anai, ƀing khua pơ ala pel ĕp, bơkơtuai hăng lăng glăi hră čih pơkra hơdôm tơlơi pơtrun pơsit yôm phăn kơ tuh pơplai bruă hrom, kah hăng: Tơlơi pơtrun pơsit hơdră pơtrun tuh pơplai, pơplih pơkra hơdră pơtrun tuh pơplai hơdôm rơwang bruă tuh pơplai bruă hrom; pơplih pơkra, pơhrua nao dong kơčăo bruă tuh pơplai bruă hrom ngăn drăp tơring čar thun 2021; hăng kơčăo bruă tuh pơplai pơhrua nao hmâo tơhnal pơkă mơng ngăn drăp kơnuk kơna thun 2021. Biă ñu, tal jơnum anai dô̆ pel ĕp hră lăi pơthâo mă yua Tơlơi pơtrun pơsit hluai tui jơlan gah tuh pơplai rơwang bruă jơlan nao rai đuăi hmar Tân Phú (Đồng Nai) – Bảo Lộc (Lâm Đồng) hmâo rơwang ataih 67km tui jơlan gah gum hrom bruă hrom hăng bruă mơnuih ƀôn sang. Sit lăi rơwang bruă jơlan anai giong amra ƀơ ƀrư̆ pơkra giong hĭ jơlan đuăi hmar Dầu Giây – Đà Lạt tui tơlơi pơkă hmâo Khua dêh čar pơsit, pơjing pran pơtrut pơđĭ kyar bơwih ƀong – mơnuih mơna, pơhlôm rơnuk rơnua pơgang lŏn ia mơng hơdôm bôh tơring čar gah kual Dăp Kơdư./.

Siu H’ Prăk: Pô pơblang