VOV4.Jarai - Grŭp djuai ania tơring čar Lâm Đồng brơi thâo, tơdơi kơ hơdôm hrơi ruah mă hluai tui tơlơi đăo gơnang mơng neh wa djuai ania ƀiă ƀơi hơdôm bôh plơi pla... truh ră anai hmâo tŭ ư ba mut amăng hră čih anăn 479 čô mơnuih hmâo arăng đăo gơnang. Hră čih anăn anai ăt dưi hmâo laih mơn Jơnum min mơnuih ƀôn sang tơring čar tŭ ư pơsit. Hơdôm mơnuih hmâo amăng hră čih anăn anai leng kơ gah mơnuih hmâo arăng đă gơnang, mơbruă, hmâo gum hơgôp hăng pơhmăi truh prong amăng kơnung djuai, plơi pla, sa dua hmâo tơhnal pơhmăi truh pơ̆ hơdôm gưl să, tơring glông, plơi prong... Gơñu ăt lĕ khul mơnuih ba jơlan hlâo amăng pơđĭ kyar bơwih ƀong, pơsur kơnung djuai hăng plơi pla ngă tui klă hơdôm tơlơi pơkôl; pơkă, sut lui hơdôm tơlơi phiăn ƀu klă sô hơđăp, ngă tui tơlơi hơdip phrâo. Hơdôm mơnuih mơbruă, hmâo arăng đăo gơnang amăng đơ đam tơring čar ăt ngă tui klă laih mơn bruă pơsur neh wa djuai ania ƀiă run pran bơwih ƀong; ngă tui tơpă hơdôm hơdră pơtrun, jơlan gah mơng Ping gah, hơdră bruă, tơlơi phiăn mơng Kơnuk kơna, djru ngă tui truh kih hơdôm tơhnal pơkă pơđĭ kyar bơwih ƀong – mơnuih mơnam, djă kơjăp tơlơi rơnuk rơnua bruă kơđi čar, hơđong pơhlôm mơnuih mơnam mơng plơi pla./.

Siu H’ Prăk: Pô pơblang