VOV4.Jarai - Jơnum min mơnuih ƀôn sang tơring čar Lâm Đồng hmâo hră rơkâo Gơnong bruă kông ngăn dlai klô hăng rơhuông adai lŏn mơnai, Jơnum min mơnuih ƀôn sang hơdôm bôh tơring glông, plơi prong pơdơi jăng jai pơsir hră pơ-ar kah lŏn ƀơi tơring čar. Rơđah biă ñu, Jơnum min mơnuih ƀôn sang tơring čar Lâm Đồng rơkâo Gơnong bruă kông ngăn dlai klô hăng rơhuông adai lŏn mơnai, Jơnum min mơnuih ƀôn sang hơdôm bôh tơring glông, plơi prong pơdơi jăng jai pơsir hră pơ-ar kah lŏn ƀơi tơring čar truh kơ hmâo tơlơi gum pơhiăp črâo ba tô̆ tui mơng Jơnum min mơnuih ƀôn sang tơring čar (kơnong kơ hră pơ-ar kah lŏn yua kơ brơi, djru amăng sang anô̆ đôč pơsir). Ngă tui tơlơi črâo ba mơng Jơnum min mơnuih ƀôn sang tơring čar, Gơnong bruă kông ngăn dlai klô hăng rơhuông adai lŏn mơnai tơring čar Lâm Đồng ăt hmâo mơn hră pơ-ar črâo ba Anom bruă ngă hră lŏn pel ĕp glăi abih bang hră pơ-ar kah lŏn hmâo tŭ mă hăng glăk dô̆ glăi akă pơsir yua kơ kiăng pơkra jơlan nao rai. Hrom hăng anun, pel ĕp hră pơ-ar, pơpha djuai rơđah rơđông; Pơdơi jăng jai tŭ mă hră pơ-ar kah lŏn phrâo hmâo truh kơ hmâo tơlơi pơsit pơkra glăi mơng Jơnum min mơnuih ƀôn sang tơring čar hăng gum pơhiăp črâo ba mơng Jơnum min mơnuih ƀôn sang tơring čar. Hơdôm bruă mă anai khom ngă tui mơtăm hăng lăi pơthâo glăi kơ Khua Gơnong bruă hlâo kơ lơ 10/6/2021./.

Siu H’ Prăk: Pô pơblang