VOV4.Jarai-Ơi Phan Văn Đa, Kơ-iăng Khua Jơnum min mơnuih ƀôn sang tơring  čar Lâm Đồng, Khua pơ ala Khul git gai sang bruă prăk djru mơnuih mơnam tơring čar pơphun jơnum hăng khua mua Sang bruă prăk djru mơnuih mơnam Lâm Đồng kơ bruă pok pơhai brơi čan rơnoh prăk djru thun 2021.

Truh ră anai, rơnoh prăk djru brơi čan amăng đơ đam tơring čar lĕ 3.800 klai prăk, đĭ tui rơbêh 38 klai prăk pơkă hăng akŏ thun. Tui hăng rơnoh jŭ yap, prăk brơi čan 2 blan akŏ thun 2021 hơmâo 146 klai prăk, rơbêh kơ 4.600 wơ̆t tuai čan.

Pơhiăp ƀơi mông jơnum, Kơ-iăng Khua Jơnum min mơnuih ƀôn sang tơring čar Lâm Đồng ơi Phan Văn Đa lăi pơtong: Hăng bruă ngă yôm phara mơ̆ng rơnoh prăk brơi čan djru kơmlai boh nik ñu tơring čar Lâm Đồng hlăk pơtum djru pơsir brơi kơ hơdră pơhrŏ ƀun rin tañ hăng hơđong kjăp.

Yua kơ anun, Sang bruă prăk djru mơnuih mơnam tơring čar khom jŭ yap glăi abih bang anăn sang anŏ ƀun rin laih anun ĕp hơdră pơsir brơi čan prăk gêh gal hloh, hơmâo akŏ bruă pơpha rơnoh prăk djơ̆ hơdră tong ten.

Nay Jek: Pơblang