VOV4.Jarai-Mơguah lơ 23/3, ƀơi anom bruă kơnuk kơna phun tơring čar, Khua mua Jơnum min djop djuai ania mơnuih mơnam Việt Nam tơring čar Lâm Đồng, jơnum mơ̆ng ataih, lăng nao rai amăng tivi, pioh pơtô brơi hơdră jơnum mă hiăp pơgôp mơ̆ng mơnuih ruah khua ƀơi anih dŏ mơ̆ng ƀing khua mua tơbiă anăn pioh ruah ngă pô pơ ala mơnuih ƀôn sang dêh čar tal XV, khua mua pơ ala mơnuih ƀôn sang djop gưl rơwang bruă thun 2021-2026.

Ƀing khua mua nao jơnum  hrăm hơdră dŏ lăng tui mơ̆ng Đà Lạt

Jơnum anai, pơphun lăng nao rai amăng tivi hăng 12 bit anih mơ̆ng tơring glông, plơi prong amăng tơring čar. Kơnang kơ jơnum anai, mă hiăp pơgôp hăng tơlơi đăo kơnang mơ̆ng mơnuih ruah khua ƀơi anih ƀing mơnuih tơbiă anăn dŏ, Khua mua Jơnum min djop djuai ania mơnuih mơnam djop gưl brơi lăng pơtong djop djel, tum teč, tơpă, rơđah rơđong hơdôm mơnuih tơbiă anăn, arăng jơnum phuă čih anăn lăi lăp djơ̆ tơhnal pơkă, ƀing ba gru hlâo, lăp hăng bruă mă pơ ala kơ mơnuih ruah khua truh kơ jơnum phuă tal klâo.

Jơnum anai, lăi pơthâo kiăng ngă tui tong ten, ngă gêh găl kơ mơnuih ƀôn sang ƀing dưi ruah khua pơdah đĭ gru grua, ngă khua pô, pơhiăp đĭ tơlơi pơgôp hiăp mơ̆ng gơñu lăi nao kơ mơnuih tơbiă anăn ruah khua. Hrơi blan pơphun jơnum hăng ƀing ruah khua djru pơgôp hiăp kơ ƀing tơbiă anăn pơphun mơ̆ng lơ 21/3 truh lơ 13/4.

Nay Jek: Pơblang