VOV4.Jarai - Tơlơi pơhing yang hrơi dŏng lơ 31/5 mơng Ding jum ia jrao brơi thâo hmâo dong 68 čô mơnuih ƀă kơman Covid-19 amăng dêh čar, kơnong kơ Bắc Giang hmâo 48 čô mơnuih, Bắc Ninh 4 čô mơnuih, Hà Nội 12 čô mơnuih, Long An 2 čô mơnuih, Daklak 1 čô mơnuih hăng Đà Nẵng 1 čô mơnuih. Ăt amăng mơguah lơ 31/5, Sang ia jrao prong Huế hmâo pơphun ngă Lơphet pok phun Grŭp ơi nai ia jrao rŏng gơgrong nao gum djru tơring čar Bắc Giang kơdŏng klin Covid-19. Grŭp hmâo 18 čô mơnuih apăn bruă, mơnuih mă bruă ia jrao lĕ hơdôm mơnuih juăt bruă gah hơdôm bruă hơkrŭ pran jua klă, hơkrŭ glăi hơtai bôh, kơdŏng ruă măt. Hrom hăng gum hrom pơjrao, ruah mă, hyu hơduah ĕp... ƀing juăt bruă Sang ia jrao prong Huế amra lăi pơthâo sa dua tơlơi lăi pơthâo glăi bôh thâo phrâo kiăng lăi pơthâo hơdôm bôh thâo hăng tơlơi găn rơgao amăng bơwih brơi hăng pơjrao mơnuih ƀă kơman Covid-19. Hlâo kơ anun, Jơnum min mơnuih ƀôn sang ƀôn prong Đà Nẵng ăt hmâo ba nao laih mơn 10 čô ơi ia jrao, mơnuih wai lăng pô ruă nao djru brơi Bắc Giang amăng bruă pơjrao, pơgang pơgăn klin Covid-19. Kơ-iăng Khua Ding jum ia jrao ơi Nguyễn Trường Sơn brơi thâo, Ding jum amra iâu nao 500 čô čơđai gưl dlông Sang hră cao đẳng ia jrao Bạch Mai hăng rơbêh kơ 400 čô mơnuih mă bruă gah ia jrao pơkon kiăng djru Bắc Giang./.

Siu H’ Prăk: Pô pơblang