VOV4.Jarai - Giăm 10 thun pơtô pơ sang hră Kơđi čar Dak Lak lĕ amăng 10 thun mơn ayong Phạm Văn Dương ngă bruă Hlăk ai tơdăm dra ƀơi sang hră. Ƀu kơnong rơgơi amăng bruă pơtô đôč ôh, ayong Dương lĕ sa čô hlăk ai hur har pran jua ngă bruă, hơmâo lu tơlơi gum pơgôp kơ bruă mơng hlăk ai.

Hơdôm hrơi anai lĕ amăng bơyan blan ngă bruă hlăk ai, mah ƀu hmao đơi ôh yua glăk pơtô čơđai pơ Anih hrăm Akŏ pơjing Ping gah, Sang hră Kơđi čar tơring čar Dak Lak, Thạc sĩ Phạm Văn Dương ăt gir ngă djŏp bruă mơng grup hlăk ai mơn. Ayong Phạm Văn Dương lăi, bruă pơtô čơđai, kơsem min boh thâo rơngiă lu mông biă, yua hnun ñu hmao lơ̆m rơnuč rơwang hrơi tơjuh đôč pioh ngă bruă hlăk ai. Khă hnun, yua khăp kơ bruă anai, mơng blung a mơtăm, lơ̆m ñu glăk hrăm hră, ayong Dương hơmâo ngă lu bruă mơng Grup hlăk ai kah hăng: jơlan hơdră Bơyan bơnga djru mơnuih ƀon sang, ngă bruă bơyan pơdơi prong mơtah, pơyơr drah djru mơnuih mơnam, nao čuă hăng brơi gơnam kơ mơnuih ƀon sang tơnap tap.

Ayong Phạm Văn Dương nao pơđok hră pơ sang pioh hră lơ̆m ñu hmao.

Mơng thun 2013, lơ̆m glăi ngă bruă pơ Sang hră Kơđi čar, hrŏm hăng bruă ñu pơtô hrăm, ñu ăt gum ngă bruă hlăk ai mơn laih anun hơmâo ruah ngă bruă amăng Grup khua apăn bruă, ngă Kơ-iăng khua hlăk ai Sang hră, laih dong ngă kơ-iăng khua Khul pơlir hơbit hlăk ai djŏp anom bruă hăng anom bơwih ƀong tơring čar Dak Lak. Ngă bruă hơget tŭ mơn, ayong Dương ăt pơmin hăng pơčeh rai hơdră ngă phrâo lăp djơ̆ či pơtrut bruă mă mơng hlăk ai.

“Sit mơng bruă djru hlăk ai mơn kâo jing thâo pơmin hloh. Mơng glăi pơtô pơ sang hră truh ră anai kâo hơmâo lu hơdră ngă bruă, pơhmutu lơ̆m hơmâo klin Covid-19 lĕ kâo ăt čih pơkra akŏ bruă hăng pơphun jak iâu grup hlăk ai pơkra đoan pơgang ia kơdah nao ƀơi ƀô̆ mơta, jak iâu anom bơwih ƀong gum djru đah mơng djru ba ƀing dŏ pơgang klin, biă ñu lĕ ƀing ơi ia jrao”.

Ayong Phạm Văn Dương hơmâo mă Hră bơni mơng Khul pơlir hơbit mơnuih mă bruă Việt Nam.

Ƀu kơnong thâo pơčeh phrâo amăng bruă ngă mơng Hlăk ai đôč ôh, ayong Phạm Văn Dương ăt hơmâo lu tơlơi pơčeh phrâo amăng bruă pơtô čơđai, gum kơsem min boh thâo. Jing sa čô nai pơtô thun hlăk ai đôč (ñu tơkeng thun 1989) samơ̆ mơng hrơi ngă bruă truh ră anai, ayong Dương hơmâo 4 tơlơi kơsem min djŏp gưl hrăm, 2 tơlơi čih ba bơkơtuai gưl jar kmar hăng rơbêh 30 tơlơi čih hơmâo čih amăng hră pôr pơhing. Lu tơlơi pơčeh phrâo hơmâo mă yua amăng tơlơi hơdip anai, ba glăi tŭ yua. Phrâo anai, ayong Phạm Văn Dương ăt gum Pơgôp hơdră akŏ pơjing hăng pơđĭ kyar tơring čar Dak Lak pơdrong asah, hiam, hăng anăn Dăp bruă pơđĭ kyar măi mok pơkra gơnam pơlir hăng pơhlôm rơnuk rơnua. Hơdră bruă anai hơmâo tơring čar djă lui hăng ba pơmut amăng hơdră djru pơ anăp anai.

“Amăng tơlơi gum pơgôp hơdră ngă bruă lĕ kâo kiăng ngă hiư̆m pă pơđĭ kyar anih pơkra gơnam hăng măi mok dưi ngă dua mơta bruă hrŏm hrŏm, ƀrô pơđĭ tui nua gơnam, ƀrô pơhlôm rơnuk rơnua plơi pla. Bruă jao lŏn, jao glai khŏm hơmâo hơdră mă yua lăp djơ̆. Hăng mrô lŏn dŏ ƀơi sa, dua boh tơring čar gah guai lŏn ia ră anai lĕ tơdah dưi pơsir kơƀah ia hăng hyu duñ abih boh ƀom, boh min lĕ dưi čuk pơkra laih anun dưi hơmâo lŏn ngă hmua, dăp mrô mơnuih ƀon sang dŏ, mơnuih mă bruă prong biă kơ guai lŏn ia ƀơi anai, kiăng pơjing rai hơdôm kual plơi pla ƀơi kual guai lŏn ia laih anun ñu yôm kah hăng anih pơgang Lŏn ia ta mơn”.

Abih pran jua ngă bruă hlăk ai, gir amăng bruă pơtô čơđai sang hră, hơdôm thun rơgao, ayong Phạm Văn Dương hơmâo mă lu hră bơni mơng tơring čar hăng gơnong dlông. Thun 2017, ayong Dương hơmâo Khua Sang hră Kơđi čar Dêh čar Hồ Chí Minh brơi Hră pơsit Nai pơtô rơgơi. Thun 2019, ñu mă Hră bơni mơng Khul pơlir hơbit mơnuih mă bruă Việt Nam yua mă bruă rơgơi, mă bruă thâo pơčeh phrâo. Ñu ăt jing sa amăng dua čô khua hlăk ai hơmâo kơdrưh biă yua hơmâo mă pri Lý Tự Trọng thun 2021. Lăi nao nai pơtô Phan Văn Dương, Nai prin tha Đỗ Văn Dương, Kơ-iăng khua Sang hră pơtô Kơđi čar tơring čar Dak Lak lăi:

“Nai Phạm Văn Dương lĕ sa amăng hơdôm čô khua hlăk ai hur har pran jua ngă bruă. Gơmơi hơdor lui djŏp tơlơi anun, ñu hơmâo lu tơlơi gum pơgôp amăng bruă kơsem min boh thâo, pơtô čơđai, ngă bruă mơng sang hră. Grup hlăk ai Sang hră ăt kah hăng khul grup hlăk ai gưl prong mơn. Rim thun nai Phạm Văn Dương lêng gir ngă djŏp bruă mơ̆ khul hlăk ai gưl prong črâo trun ăt kah hăng mơng hơdôm anom bruă pơphun bơkơtưn ñu lêng ngă tom”.

Ayong Phạm Văn Dương ră ruai, ñu lăng kơdrưh biă yua hơmâo tơlơi gum djru mơng khua mua, mơng ƀing gŏp ngă bruă hrŏm. Anun lĕ tơlơi pơtrut pran jua kiăng ñu ngă bruă klă hloh, gum pơgôp lu hloh amăng djŏp bruă gah hlăk ai, ăt kah hăng gir hloh dong a măng bruă pơtô čơđai sang hră.

H’Xíu: Čih - Siu H’Mai: Pơblang