VOV4.Jarai-Mơguah tom brơi, lơ 17/3, ƀơi anom bruă khua mir sir, Khua anih jưh pơ ala dêh čar Panama, Eligio Alberto Salas De Leon, Khua anih jưh pơ ala dêh čar Singapore, Jaya Ratnam, Khua anih jưh pơ ala dêh čar Indonesia, Denny Abdi nao pơdah thâo hră pơđĭ bruă mơ̆ng dêh čar gơñu kơ Khua git gai ping gah, khua mir sir ơi Nguyễn Phú Trọng.

Khua git gai ping gah, khua mir sir tŭ jum ră ruai tom, giong anun lăi, ăt đăo kơnang tơlơi thâo thăi tom găn rơgao, laih anun tơlơi thâo hluh kơ Việt Nam, ƀing khua anih jưh pơ ala djop dêh čar anai amra ngă giong bruă jao, pơtrut tơlơi ngă giăng mah gơyut gơyâo kơplah wah Việt Nam hăng hơdôm dêh čar anai.

Khua git gai ping gah, khua mir sir brơi thâo, Việt Nam phrâo jơnum truh kih ruah khua ping gah dêh čar tal XIII.

Biă mă ñu gah bruă pơtom hiăp, Jơnum ruah khua ping gah tal XIII lăi pơtong, Việt Nam amra pơtrut ngă hrom lu bơnah, lu hơdră; prăp lui mut phung jar kmar hlôm bôm; prong hloh, lu bơnah laih anun kjăp kơtang hăng hơdôm bơnah ngă hrom, amăng anun hơmâo hơdôm dêh čar mơ̆ ƀing khua anih jưh pơ ala anai glăk mă bruă.

Nay Jek: Pơblang