VOV4.Jarai-Tlam lơ 17/3, tŭ jum Khua čih pioh Khul tơhan pơgang rơnuk rơnua dêh čar Nga, Khua tơhan krên dên đại tướng ơi Patrusev Nikolai Platonovich, ơi Nguyễn Xuân Phúc Khua dêh čar ta pơdah pran jua hok mơak, bruă dêh čar Nga hơmâo kơsem min tŭ yua, pơkra rai ia jrao pơgang vaccine hăng pơjrao mơnuih ƀă kman Covid 19; đăo kơnang kjăp lĕ, dêh čar Nga amra tañ găn rơgao hĭ tơlơi tơnap klin kheng ngă.

Tal rai čuă dêh čar Việt Nam mơ̆ng Khua čih pioh Khul tơhan rơnuk rơnua dêh čar Nga jing yom biă mă, tŏ tui bruă mă hơdor glăi 70 thun akŏ pơjing bruă pơtom hiăp giăng mah Việt –Nga. Khua dêh čar hok mơak ƀuh boh tơhnal mă bruă mơ̆ng Grup hăng Ding jum ling tơhan Việt Nam laih anun Ding jum kông an ăt hnun mơ̆n.

Tơlơi anai ƀuh tui bruă ngă hrŏm pơgang rơnuk rơnua dua bơnah, ling tơhan jing tơmeh phun kơ bruă ngă hrŏm dua bơnah. Khua dêh čar rơkâo gah dêh čar Nga ăt pơtrut tui bruă ngă hrŏm gah ling tơhan; kơtưn pơgăn tơlơi soh sat, yua kiăng hơmâo anŏ tŭ yua kơ mơnuih ƀôn sang dua bơnah, yua tơlơi mơak hơđong laih anun pơđĭ kyar hrŏm.

Nay Jek: Pơblang