VOV4.Jarai - Lơ 17/3, ƀơi Hà Nội, Ping gah Khul ling tơhan, Ding jum ling tơhan pơphun pơbưp ƀing hlăk ai ba gru rơgơi mơbruă amăng khul ling tơhan thun 2020. Đại tướng Ngô Xuân Lịch, Kơ-iăng khua Ping gah khul ling tơhan, Khua ding jum ling tơhan nao pơhmư̆ hăng git gai mông jơnum. Thun 2020, bruă mă gah hlăk ai hơmâo ngă abih bang amăng ling tơhan, hăng lu tơlơi, hơdră ngă bruă phara. Hlăk ai amăng khul ling tơhan hơmâo gir ngă bruă, găn rơgao tơlơi tơnap tap, gir bơkơtưn, ngă truh kih bruă hơmâo jao. Thun 2020, khua mua amăng anom bruă hơmâo pơpŭ bơni giăm 2.000 čô hlăk ai rơgơi mơbruă, khua mua mơng Ping gah khul ling tơhan - Ding jum ling tơhan hơmâo bơni kơ 313 čô hlăk ai; Khul khua wai lăng abih bang tơhan hơmâo ruah mă 10 čô hlăk ai ba gru rơgơi mơbruă hăng 18 čô hlăk ai arăng čang rơmang dưi ngă bruă prong. Ƀơi mông bưp, Đại tướng Ngô Xuân Lịch pơsit pơđĭ grăt sĩ quan hlâo hrơi pơkă laih dong ruah tơhan apăn bruă hăng 4 čô hơmâo hră bơni hlăk ai rơgơi mơbruă thun 2020.

Siu H’Mai: Pơblang