Amăng sang phrâo man pơdong, amai Hiao, dŏ amăng plơi Bông Phul, să Chư Á, plơi prong Pleiku ƀu hơgŏm pran jua hok mơ-ak. Ñu bơră ruai glăi, hlâo adih sang anŏ dŏ amăng sang tơ̆i rơ̆i, bơyan hơjan kơthel lêng ƀu hơ-et ôh. Hơmâo tơlơi đing nao mơng gong gai hăng ngăn rơnoh mơng jơlan hơdră pơhrŏ trun ƀun rin hơđong kjăp, ñu hơmâo laih sa boh sang phrâo kiăng hơđong tơlơi hơdip mơda hăng dưi hrưn đĭ pơklaih mơng ƀun rin:

“Sang anŏ gơmơi rin rơpa, tơnap tap biă mă. Sang sô tơ̆i rơ̆i, bơyan hơjan tơdjoh pơsah abih, pit dih ƀu hơ-et. Ră anai hơmâo tơlơi gum djru dưi man pơdong sang phrâo, ăt hok mơ-ak biă mă mơn”.

Hrŏm hăng sang anŏ amai Hiao, mơng thun 2021 truh ră anai, Ping gah să Chư Á hơmâo git gai gong gai hăng Jơnum min djop djuai ania mơnuih mơnam tŭ mă djop ngăn rơnoh mơng jơlan hơdră, akŏ bruă. Hơdôm ngăn rơnoh djru mơng pơhrŏ trun ƀun rin, keh prăk “Yua kơ mơnuih ƀun rin”, hơmâo djru man pơdong sang brơi 33 boh sang anŏ ƀun rin hăng jao 64 drơi rơmô djru brơi hơdôm boh sang anŏ giăm ƀun rin pơđĭ kyar bơwih ƀong huă. Truh ră anai, să Chư Á hơmâo laih 16 boh sang anŏ pơklaih mơng ƀun rin hăng 12 boh sang anŏ pơklaih mơng giăm ƀun rin, pơhrŏ trun mrô sang anŏ ƀun rin amăng să dŏ 39 boh (dưm dưm 1,58%). Ơi Trương Văn Minh, Kơ-iăng khua git gai Ping gah, Khua Jơnum min mơnuih ƀôn sang să Chư Á brơi thâo:

“Pơ anăp anai, Ping gah hăng gong gai ƀon lan đing nao git gai mơnuih ƀôn sang mă yua djop ngăn rơnoh kiăng ngă tui hơnong pơkă pơhrŏ trun ƀun rin mơng anai truh thun 2025. Sit biă ñu, bruă pơtô hrăm brơi mơnuih mă bruă amăng ƀon lan, sit biă ñu kual mơnuih djuai ania ƀiă, djru brơi mơnuih ƀôn sang hơmâo bruă mă hơđong, pơklaih mơng ƀun rin hơđong kjăp. Gir run truh thun 2025, să amra ƀu hơmâo dong tah sang anŏ ƀun rin.”

Mơng thun 2021 truh ră anai plơi prong Pleiku hơmâo djru man pơdong sang hăng pơkra ming 64 boh sang brơi mơnuih ƀun rin, hăng abih tih prăk mă yua rơbêh 3 klai prăk. Giăm 100 boh sang anŏ ƀun rin hăng giăm ƀun rin dưi čan prăk mă kmlai ƀiă kiăng pơđĭ kyar bơwih ƀong huă, hăng mrô prăk rơbêh 4,6 klai prăk. Ră anai plơi prong dŏ kơnong 149 boh sang anŏ ƀun rin, dưm dưm 0,24%. Mrô sang anŏ ƀun rin kual mơnuih djuai ania ƀiă ăt hrŏ trun kơtang mơng 2,94% thun 2021 dŏ 1,29%. Ngă tui hơdôm boh than dưi ngă anun, Ping gah plơi prong Pleiku amra tŏ tui git gai djop ƀon lan mă yua hrŏm djop ngăn rơnoh, ruah mă hơdôm hơdră djru ba glăi tŭ yua, lăp djơ̆ brơi rĭm čô mơnuih. Yă Nguyễn Thị Thuý Diễm, Kơ-iăng Khua git gai Ping gah, Khua Jơnum min mơnuih ƀôn sang să Diên Phú, plơi prong Pleiku brơi thâo:

“Ƀing gơmơi tŏ tui pơjing akŏ bruă gum djru brơi sang anŏ ƀun rin rơwang phrâo thun 2025; hrưn đĭ prăk pơhrui brơi mơnuih ƀôn sang, ngă tui hơdôm boh than dưi ngă amăng pơhrŏ trun ƀun rin amăng hrơi blan rơgao hăng ngă klă ƀiă dong pơ anăp anai”.

Ơi Nguyễn Thanh Bình, Kơ-iăng khua Jơnum min djop djuai ania mơnuih mơnam Việt Nam plơi prong Pleiku brơi thâo, pơ anăp anai Jơnum min amra gum hrŏm hăng Ping gah, gong gai plơi prong Pleiku amăng ngă tui hơdră bruă djuai ania hăng pơhrŏ trun ƀun rin hơđong kjăp:

“Pơ anăp anai, Jơnum min djop djuai ania mơnuih mơnam Việt Nam plơi prong hăng djop khul grup, djop gơnong bruă amra tŏ tui gum hrŏm, pơtrut kơtang bruă pơtô pơblang, pơtrut pơsur mơnuih ƀôn sang ngă tui klă hơdôm tal pơphun pơplông khăp kơ lŏn ia pơlir hăng jơlan hơdră tui hơnong pơkă dêh čar pơhrŏ trun ƀun rin hơđong kjăp, hrưn đĭ klă dong tơlơi hơdip kơ mơnuih ƀôn sang amăng plơi pla djuai ania ƀiă.”

Hơdôm boh than ba glăi yôm hloh amăng bruă pơhrŏ trun ƀun rin hơđong kjăp ƀơi plơi prong Pleiku, tơring čar Gia Lai brơi ƀuh, tơlơi git gai djop mơta, jê̆ giăm mơng khul grup Ping gah hơmâo pơtrut djru brơi mơnuih ƀôn sang, sit biă ñu lĕ mơnuih djuai ania ƀiă, hrưn đĭ pơklaih mơng ƀun rin, anăp nao tơlơi hơdip hơđong hăng pơđĭ kyar kjăp phik. /.