Jing sa amăng hơdôm să dơnong ngă hmua pơdai ƀơi tơring glông Krông Ana, tơring čar Dak Lak, să Hòa Bình lu tơlơi tơnap tap pioh ngă tui djop tơhnal pơkă plơi pla phrâo, boh nik ñu tơhnal pơkă kơ jơlan glông nao rai amăng plơi pla. Hăng tơlơi gir run khut khăt mơ̆ng anom bruă ping gah, gong gai kơnuk kơna să laih anun hơmâo tơlơi tŭ ư sa pran jua mơ̆ng ană plơi pla, să Hòa Bình hơmâo dưi ngă djơ̆ laih mơ̆n tơhnal pơkă plơi pla phrâo amăng thun 2017. Truh ră anai, să ăt hlăk gir run ngă giong tơhnal pơkă plơi pla phrâo hiam hloh, anăp nao man pơdong plơi pla phrâo rơgơi. Yă Nguyễn Thị Hiền Trinh, Khua Jơnum min djop djuai ania mơnuih mơnam să Hòa Bình brơi thâo:
 “Lơ̆m man pơdong plơi pla phrâo rim thun khul hơmâo jak iâu, pơtô ba ană plơi pla, khul wai lăng djop djuai ania mơnuih mơnam pơphun bruă mă ƀơi plơi pla, tơhnal pơkă kiăng pơtô lăi mơnuih ƀôn sang brơi ƀuh boh yom phun ngă tui hơdră dêh čar djru hiư̆m pă, lu mơnuih ƀôn sang dong yua, djru hrŏm, pơgôp pran jua, dram gơnam  pioh man pơdong plơi pla phrâo....Truh ră anai, 99% arăt jơlan nao rai amăng plơi pla hơmâo tuh kơsu hăng simăng laih”.

Hăng să Ea Sol, tơring glông Ea Hleo, tơring čar Dak Lak, yak nao kơ bruă man pơdong plơi pla phrâo thun 2011, amăng să prong rơhaih, mơnuih ƀôn sang dŏ hui dui taih ha bit, rơnoh pơhrui glăi mă bruă sa thun rim čô mơnuih dŏ ƀiă, jơlan glông nao rai aka ƀu pơđĭ kyar, lơ̆m anun prăk kăk mơ̆ng să dŏ kơƀah. Ping gah, gong gai kơnuk kơna să Ea Sol đing nao bruă brơi pơđĭ tui tơlơi hơdip mơda kơ mơnuih ƀôn sang hlâo hloh, pơtrut bruă ngă hiư̆m pă pơđĭ rơnoh pơhrui glăi kơ mơnuih ƀôn sang, mơ̆ng bruă pơtrut mơnuih ƀôn sang gir run amăng plơi pla, hăng pran jua pô ta gum hrŏm man pơdong plơi pla phrâo. Djop gưl anom bruă ping gah, gong gai kơnuk kơna, djop khul grup mơnuih mơnam pơtrut bruă pơtô pơblang, jak iâu mơnuih ƀôn sang ngă tui boh thâo ia rơgơi phrâo amăng bruă mă, bơwih ƀong huă, biă mă ñu ngă hmua pla pơjing khom pơblih pơjeh djuai phun pla, hlô mơnong rông kiăng ba glăi boh tŭ yua lu hloh. Ơi Hoàng Trở, Khua khul mơnuih ngă hmua să Ea Sol brơi thâo, truh rơnuč thun 2023, să hơmâo kơnuk kơna pơsit laih jing sa plơi pla phrâo:

“Pơblih yua mrô amăng bruă ngă hmua pla pơjing, ba pơjeh phun pla hơmâo rơnoh yom kơ tơlơi bơwih ƀong huă, jak iâu pơtô lăi ană plơi pla đing nao hloh ruah mă pla hơdôm mơta phun: Boh sầu riêng, makka, boh jrang yuan "nhãn hương chi"...kiăng hơmâo rơnoh yom kơ tơlơi bơwih ƀong huă”.

Hăng lu hơdră ngă tui, thâo pơčeh phrâo, beč bal hmar hloh, djơ̆ găl hăng anŏ gêh găl lŏn mơnai, ayuh hyiăng kual plơi pla, boh nik ñu pơđĭ tui tơlơi kơtang git gai, ba jơlan hlâo mơ̆ng mơnuih ping gah, anom bruă, khul ping gah, anun truh ră anai, đơ đam tơring čar Dak Lak hơmâo 78/151 boh să plơi pla phrâo, 5 boh să plơi pla phrâo hiam hloh, 1 boh tơring glông bơkơnar plơi prong yap ngă giong tơhnal pơkă plơi pla phrâo, anun lĕ plơi prong Ƀuôn Ma Thuôt, ngă giong djop laih tơhnal pơkă plơi pla phrâo. Anăp nao truh abih thun 2025, Dak Lak amra hơmâo 100 boh să, 4 boh anom bơkơnar plơi prong, ƀudah tơring glông dưi ngă djơ̆ tơhnal pơkă plơi pla phrâo.

Kiăng dưi ngă tơhnal pơkă anai, tui hăng ơi Nguyễn Đình Trung, ding kơna apăn bruă ping gah dêh čar, Khua git gai ping gah tơring čar Dak Lak brơi thâo, tơring čar ăt pơtrut pơđĭ tui hloh tơlơi thâo hluh kơ ană plơi pla, tơlơi gơgrong, glăm ba mơ̆ng khua mua djop gưl ping gah, gong gai kơnuk kơna hăng abih bang amăng glông bruă kơđi čar amăng bruă mă man pơdong plơi pla phrâo:

“Tơring čar hơmâo dăp akŏ bruă rơđah rơđong biă mă, să pơpă dŏ kơƀah anŏ hơgĕt, tơring čar nao ngă bruă ĕp lăng tong ten ƀơi djop să, mơ̆ng anun hơmâo hơdră djru ba man pơdong plơi pla phrâo djop tơhnal pơkă khom ngă giong. Tơhnal pơkă truh tuč rơnuč lĕ hrŏm hơbit pơđĭ kyar bơwih ƀong huă mơnuih mơnam ăt khom pơhlôm ba amăng bruă man pơdong plơi pla phrâo klă hloh, tơlơi hơdip mơda mơ̆ng mơnuih ƀôn sang ƀơi kual plơi pla dưi pơđĭ tui, glông bruă kơđi čar kơjăp kơtang tui”.

Pơđĭ tui tơlơi gơgrong, glăm ba mơ̆ng djop gưl, anom bruă gong gai kơnuk kơna laih anun tơlơi ngă hrŏm mơ̆ng abih bang amăng plơi pla lơ̆m bruă gum hrŏm bơkơtưn “ Dak Lak gum tơngan hrŏm man pơdong plơi pla phrâo”, hơdôm plơi pla kual ataih ƀơi Dak Lak hlăk jai hrơi, pơblih phrâo, ba glăi tơlơi hơdip mơda trơi pơđao yâo mơak kơ mơnuih ƀôn sang.