Ayong Rčom Vu, ƀơi plơi Ia Rniu, să Ia Boăi, tơring glông Ia Pa glăk gun bơwih brơi kơ đang kơtor sinh khối prong 1 ektar. Rčom Vu brơi thâo, anai lĕ bơyan pla kơtor tal 3 amăng sa thun, djru sang anô̆ hmâo prăk pơhrui glăi 80 klăk prăk tơdơi kơ kah đuăi prăk yua pla.

 “Hăng hơdră pla phrâo, neh wa pla kơtor sinh khối hmâo lu anô̆ gal, mơ̆ng hơdră pơkra lŏn, truh dưm đing ia tơdjoh pioh gơgrong hlâo pruih ia, bruă mă ră anai ăt djôl hloh mơn bơhmu hăng hlâo adih. Ƀơƀiă truh kih mơ̆ng bruă pla anai ăt kơnang kơ amai Kpă H’Yư mơn, ñu apăn bruă đah kơmơi să pơtô brơi abih pran jua kơ sang anô̆ hăng neh wa amăng plơi mơ̆ng hơdôm hrơi blung a mơtăm”.

Ơi Rčom Tiêu – Khua plơi Ia Rniu mơ-ak brơi thâo: Kơnang kơ mă bruă djơ̆ bôh thâo phrâo, rim ektar kơtor sinh khối amra pơhrui hmâo mơ̆ng 35 truh 40 tơn. Mơ̆ng bruă pơplih hơdră ngă phrâo, plơi Ia Rniu hmâo hrŏ trun tañ laih mrô sang anô̆ ƀun rin, ră anai kơnong kơ dô̆ 73 bôh sang anô̆.

 “Hlâo adih pla kơtor 1 thun sa bơyan đôč, samơ̆ mơ̆ng hrơi mă yua hơdră pla kơtor sinh khối lĕ sa thun neh wa dô̆ pla mơ̆ng 3-4 bơyan dong, gah đah kơmơi ăt hmâo jơnum mơn adơi amai amăng khul lăi pơhing bruă mă yua hơdră pla kơtor sinh khối, hơdră ngă dưi lăi pơthâo tui hơdră phara, mơ̆ng hơdră pruih ia tơdjoh, bruă pruai kơmok, pruih ia jrao ăt dưi hmâo hơdôm mơnuih amăng khul ngă juăt mơn, mơ̆ng hrơi mă yua hơdră anai mrô kơtor pơhrui glăi ăt đĭ lu rơđah mơn”.

Bruă djru neh wa djuai ania Jarai pơplih phun pla, mă yua bôh thâo phrâo amăng bruă ngă đang hmua hmâo pran jua lăp yap ba mơ̆ng amai Kpă H’ Yư, Khua Khul pơlir hơbit đah kơmơi să Ia Ƀroăi. Ñu pơphô brơi klă hăng gưl ping gah, gong gai ƀơi anai pok pơhai lu hơdră pơđĭ kyar bơwih ƀong ba glăi bôh tơhnal amăng kual djuai ania ƀiă. Amai Kpă H’ Yư, ră ruai:

 “Drơi pô kâo ăt juăt hyu pơsur mơn adơi amai, djop mơnuih khom amăng ƀrư̆ pơplih tơlơi pơmin hơdră ngă; khom mă yua bôh thâo phrâo, kah hăng hlâo adih pla lĕ tơguan hmâo ia hơjan trun, samơ̆ ră anai ta ƀôp mă ia pruih tơdjoh, mă yua kơmok pruai, jrao pơgang phun pla kiăng ba glăi bôh tơhnal amăng bruă ngă đang hmua, ră anai lu adơi amai pơplih laih tơlơi pơmin hơdră ngă hăng thâo mă yua bôh thâo phrâo măi mok amăng ngă đang hmua”.

Tui hăng ơi Vương Chí Thông, Kơ-iăng Khua git gai Ping gah să Ia Ƀroăi, hăng tơlơi gir run ƀu pơdơi mơ̆ng mơnuih apăn bruă abih pran jua kah hăng amai Kpă H’ Yư, bruă hrŏ trun ƀun rin să glăk hmâo hơdôm bôh tơhnal lăp pơsur biă.

 “Gru ba jơlan hlâo mơ̆ng Khua Khul pơlir hơbit đah kơmơi să hur har pran jua biă, abih pran jua amăng lăi pơhing pơsur neh wa amăng bruă hrŏ trun ƀun rin, neh wa hmư̆ tui, djru brơi bruă hrŏ trun ƀun rin mơ̆ng să gêh gal hloh. Ñu dưi hmâo Khul pơlir hơbit đah kơmơi dêh čar Việt Nam ƀơk hră bơni. Khă hnun hai, hăng ñu, črăn bơni prong hloh lĕ tơlơi đăo kơnang, kiăng khăp mơ̆ng neh wa hăng hơdôm tơlơi pơplih klă amăng tơlơi hơdip mơda mơ̆ng mơnuih ƀôn sang ƀơi anai"./.