Mơ̆ng kual krah tơring glông Kbang (tơring čar Gia Lai), sang anô̆ amai Nguyễn Thị Thu Huyền, tuai mơ̆ng Hà Nội, hmâo laih bruă hyu čuă lăng mơ-ak ataih giam truh 70km tui jơlan tơring čar 669 nao pơ̆ drai ia Lơ Lung, dô̆ iâo lĕ drai ia Ba Tầng ƀơi plơi Kon Bông, să Đăk Krông. Ƀơi anai, abih bang sang anô̆ pơhrua pô amăng glông ia rơ-ơ̆, jơngeh ƀơhač hăng glai klô hiam. Čơđai muai ngui ngor ƀơi hơdôm anih ia đil, lơm anun mơnuih prong wah akan hăng čơphin rŭp ƀơi tơ-ui kyâo, hrip mă ayuh klă hiam mơ̆ng glai kơmrông. Pô pơtô brơi kơ tuai hyu čuă ngui ƀơi anai, djru tuai ĕp lăng anô̆ hiam jum dar drai ia. Tơdơi kơ 2 mông ngui ngor, abih bang grŭp pơwot glăi plơi pioh ƀong lông lăng hơdôm gơnam ƀong đưm kah hăng añăm glai, akan čroh ia hăng ia hni glai. Abih bang leng kơ yua neh wa ƀơi anai pla hăng rông. Amai Huyền lăi pơthâo:

“Rơgao kơ găn jơlan  kiăng rai pơ̆ anai lăp djơ̆ biă. Rô hyu glêh ƀiă, samơ̆ ƀuh ñu hiam biă! Lăng sing sang. Drai ia hiam, ayuh hyiăng ăt klă tui pran mơnuih mơn. Sit nik sa tal hyu čuă lăng mơ-ak kloh rơnoh”.

 Hăng hơdôm khul mơnuih kiăng hyu hơduah ĕp lăng hăng găn rơgao laih bôh thâo đưm mơ̆ng djuai Bahnar, ană plơi amra jak iâo gơñu dô̆ glăi. Mlăm truh, tuai amra hmư̆ jua čing hơgor hăng suang hrŏm hăng mơnuih ƀôn sang ƀơi anai jum dar apui krom. Kơnong mơ̆ng blan 1/2024 truh ră anai, plơi Kon Bông hmâo čơkă laih rơbêh kơ 40 grŭp tuai, hăng rim grŭp mơ̆ng 20 truh 30 čô mơnuih. Gơñu hyu hơduah ĕp lăng anô̆ hơnong hơđăp đưm mơ̆ng glai, mơ̆ng čroh ia hăng drai ia Ba Tầng. Neh wa djuai ania Bahnar ƀơi anai phrâo ngă juăt hăng bruă čơkă tuai. Kơnang kơ tơlơi ƀu hreč amăng bruă ba tuai hyu čuă ngui yơh, ngă tuai jai ƀuh mơ-ak hloh. Ơi Đinh Văn Nhú, Khua git gai Ping gah, Khua plơi Kon Bông lăi pơthâo: Neh wa ƀing gơmơi čơkă tuai hăng pran jua tơpă sit.

“Hơdôm gơnam mơ̆ng neh wa amăng plơi pơkra kah hăng: mơnŭ, un rông tlaih hăng bôh čik, dưi hmâo tuai hor biă. Ră anai hmâo lu sang anô̆ amăng plơi hmâo laih gơnam tam hăng gum hrŏm bruă ba tuai hyu čuă lăng. Grŭp Ping gah plơi ăt lăi pơhing mơn kiăng neh wa kơtưn pơđĭ kyar bruă bơwih ƀong, pla phun bôh troh, rông un jŭ hăng mơnŭ bip, pơkra tơpai hnar. Ƀing gơmơi dô̆ djă pioh pơhrăm brơi grŭp atông čing hơgor hăng grŭp adôh suang pioh pơdah kơ tuai lăng”.

Kual djă pioh glai kơmrông rŏng lŏn tơnah čư̆ siăng Kon Hà Nừng dŏng gah Ngŏ Kơdư tơring čar Gia Lai, giăm hăng Kon Tum, Quảng Ngãi hăng Bình Định, hmâo abih bang lŏn prong rơbêh kơ 413.000 ektar. Kual phun mơ̆ng kual anai lĕ Glai lŏn ia Kon Ka Kinh hăng Kual pơgang glai klô Kon Čư Răng, biă ñu lĕ glai tha hăng glai kơmrong. Ơi Nguyễn Hồng Quân, Kơ-iăng Khua gơgrong bruă Kual pơgang glai klô Kon Čư̆ Răng lăi lĕ anô̆ gal pơđĭ kyar bruă tuai čuă lăng glai klô, čuă laih ƀơi anih tơnap nao rai ƀơi anai prong biă. Samơ̆ abih bang kah hăng ƀu hmâo hlơi đing nao ôh.

“Kual pơgang glai klô Kon Čư̆ Răng hmâo rơbêh kơ 20 bôh drai ia amra ba mut amăng pơlar anih tuai čuă lăng. Tuh pơplai amăng hơdôm bruă tuai čuă ngui lĕ tơhnal pioh lăi pơhưč Čư̆ siăng Kon Hà Nừng truh hăng hơdôm khul grŭp amăng lŏn ia hăng jar kơmar”.

Ơi Nguyễn Văn Hoan, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Gia Lai brơi thâo tơring čar glăk pok pơhai lu bruă mă tuai čuă lăng glai klô plơi pla hăng drai ia pioh pơjing bruă mă kơjăp sui thun kơ neh wa djuai ania ƀiă hơdip ƀơi kual anai. Tơring čar ăt glăk ngă tui mơn kơčăo bruă ngă tui nua yôm čư̆ siăng Kon Hà Nừng hăng hơdôm bruă mă rơđah pioh pơđĭ glông prăk pơhrui glăi kơ mơnuih ƀôn sang ƀơi anai:

 “Tơring čar Gia Lai hmâo pơjing laih Grŭp wai lăng Kual pioh glai kơmrong čư̆ siăng Kon Hà Nừng, yua kơ Kơ-iăng Khua Jơnum min mơnuih ƀôn sang tơring čar ngă Khua grŭp. Mơ̆ng anun, tơring čar glăk pok pơhai hơdôm bôh yôm rơđah amăng jơlan hơdră ngă tui nua yôm anai, kah hăng pơjing logo pioh lăi nao hăng plăng web rơđah. Abih bang gơnam mă mơ̆ng đang hmua dưi ngă rai ƀơi anai ăt amra dưi pơkĕ hrŏm hăng anăn păn hơduah ĕp, pioh đĭ nua gơnam”.

Hơdôm tơlơi gir run ngă tui nua yôm bôh thâo đưm hăng glai klô ƀơi kual djă pioh glai kơmrong čư̆ siăng Kon Hà Nừng mơ̆ng tơring čar Gia Lai glăk pok tơbiă jơlan nao phrâo kơ tơlơi pơđĭ kyar kơjăp phik. Gru rup đưm hơđăp mơ̆ ngă pơhưč pran jua ană mơnuih ƀơi čư̆ siăng, glai kơmrong sing sang, čroh ia jơngeh ƀơhač rơ-ơ̆ hyom, drai ia kô̆ phông ... sit ñu amra jing anih nao jai hrơi jai lu tuai amăng lŏn ia hăng mơ̆ng dêh čar tač rơngiao. Kon Hà Nừng hmâo râo pơdưh laih./.