Dong mơ̆ng thun 2009, ơi Đinh Văn Bới djuai ania Bahnar ƀơi plơi Đăk Kjông, să Lơ Ku, tơring glông Kbang, tơring čar Gia Lai hmâo yua abih prăk hmâo pioh pla 4 ektar đang keo. Ñu dô̆ čan dong 50 klăk prăk mơ̆ng Sang peăk gah hơdră bruă mơnuih mơnam tơring glông Kbang pla 5 ektar đang phun bạch đàn. Tơdơi kơ lu thun bơwih brơi, ñu dưi pơhrui hmâo mơ̆ng đang keo hăng sĭ hmâo nua 85 klăk prăk sa ektar. Ơi Đinh Văn Bới brơi thâo, bruă pla kyâo hmâo djru laih sang anô̆ hmâo anô̆ ƀong anô̆ huă anô̆ pioh lui:

“Pla kyâo lĕ ƀu glêh mơ̆ hmâo prăk pơhrui glăi lu hloh. Pla kơtor ƀu hmâo lu hăng phun keo ôh mơ̆, phun keo khă sui thun samơ̆ kơnong kơ kiăng pơhrui hmâo sa wot lĕ hơđong yơh. Hơdră ngă ăt ƀu tơnap mơn, biă ñu blơi djuai pơjeh, blơi jrao pơgăn mua, jah rok rim thun dua wot”.

Ơi Phùng Văn Minh djuai ania Mường ƀơi thôn 2, să Lơ Ku, tơring glông Kbang, tơring čar Gia Lai ăt hmâo hrưn đĭ ngă pơdrŏng mơ̆ng bruă pla kyâo mơn. Pơphun amăng thun 2010, lơm gum hrom sa rơwang bruă pla kyâo dưi kơnuk kơna djru djuai phun keo brơi đôč. Hăng 3 ektar đang keo blung a pơhrui amăng thun 2016, sang anô̆ tla abih hnưh dŏng hăng hmâo prăk tuh pơplai. Ơi Phùng Văn Minh hơk mơ-ak, kyâo hmâo djru laih tơlơi hơdip mơda pơplih phrâo abih bang:

“Pla kyâo ƀu hmâo rơngiă đôč ôh. Hơdôm thun hăng anai, pơhrui mơ̆ng kyâo pla lu prăk hăng hmâo mông văn dong. Arăng sĭ tui ektar, bơ̆ kâo lĕ sĭ ƀơi sang măi. Sĭ hĭ blơi rơdêh pioh pơgiăng gơnam mơ̆ng glai nao pơ̆ sang măi. Hlâo adih pla phun pla ƀiă hrơi kơnong kơ djop ƀong, djop huă, čan prăk sang prăk na nao. Samơ̆ mơ̆ng hrơi pla kyâo, tơlơi hơdip mơda đĭ gŏ amŏ ƀiă laih”.

Dong mơ̆ng thun 2021 truh thun 2023, tơring glông Kbang hmâo pla laih giăm truh 3.200 ektar đang kyâo. Kơnong kơ să Lơ Ku hmâo rơbêh kơ 700 ektar đang kyâo, amăng anun ha mơkrah glăk amăng thun koh pơhrui sĭ. Ơi Trần Xuân Nam - Khua Jơnum min mơnuih ƀôn sang să Lơ Ku, tơring glông Kbang brơi thâo, să gum hrŏm hăng Sang prăk gah hơdră bruă mơnuih mơnam pioh djru mơnuih ƀôn sang čan prăk blơi anah pơjeh pla hăng bơwih brơi kơ đang kyâo. Mơnuih ƀôn sang ăt dưi pơsur mơn pla plah nao djop mơta phun pla ƀiă hrơi kah hăng hơbơi plum, rơtă, hơbơi pơtơi pioh hmâo dong prăk pơhrui glăi. Bruă pla kyâo ƀu kơnong kơ pơjing bruă mă ôh mơ̆ dô̆ djru mơnuih ƀôn sang mă yua tŭ lŏn kơdư, lŏn dơnung, pơgăn lŏn tơhroh hăng pơđĭ prăk pơhrui glăi, biă ñu lĕ neh wa djuai ania ƀiă. Ơi Trần Xuân Nam brơi thâo:

“Rim thun, să gum hrŏm hăng Anom bruă đang hmua hăng Anom bơwih brơi bruă đang hmua tơring glông Kbang pơphun hơdôm anih pơhrăm hơdră pla hăng bơwih brơi kơ phun kyâo. Neh wa dưi pơtô ba bruă klơi luh jah rok hăng bơwih brơi kơ phun pla rim tal”.

Gia Lai ră anai hmâo rơbêh kơ 723.000 ektar lŏn pơkă pla kyâo, amăng anun hmâo 152.470 ektar đang kyâo pla. Mrô gôm lŏn hmâo 47%. Ơi Nguyễn Văn Hoan – Kơ-iăng Khua Gơnong bruă đang hmua hăng pơđĭ kyar ƀon lan tơring čar Gia Lai – brơi thâo, ngă tui Tơlơi pơtrun pơsit 06 mơ̆ng dêh čar thun 2017 mơ̆ng Ping gah tơring čar Gia Lai kơ pơđĭ kyar đang kyâo kơjăp phik hăng juăt hăng pơplih ayuh hyiăng rơwang 2021-2030, truh ră anai tơring čar hmâo pla rơbêh kơ 16.721 ektar glai kyâo.

“Ƀing gơmơi pơsit ngăn rơnoh mơnuih mơnam lĕ bôh than yôm phăn pioh hmâo dưi ngă hơdôm tơhnal ba tơbiă mơ̆ng tơlơi pơtrun pơsit. Ƀing gơmơi iâo pơhrui pran mơnuih ƀôn sang, mă yua mơnuih mă bruă hăng lŏn drŏn hơđăp hmâo, pơplih mơ̆ng ngă hmua hơdai nao ngă đang kyâo sui thun pioh hmâo dong prăk pơhrui glăi kơ mơnuih ƀôn sang. Hơdôm bôh ƀirô juăt bruă hmâo jao tơhnal rơđah pioh pơđĭ kyar bơwih ƀong mơ̆ng glai hăng ba glăi bôh tơhnal dlông”.

 Kơnang kơ pơsit jơlan gah djơ̆ hăng hơdră bruă lăp djơ̆ hăng bruă pơlar glai klô, mơnuih djuai ania ƀiă ƀơi Gia Lai hmâo hăng glăk hmâo kĕ phĭ hăng glai kyâo, djru pơgang glai klô anih anom dô̆ hăng djru tơlơi hơdip mơda jai hrơi jai hơđong, pơđĭ kyar hloh./.