Rơđah biă ñu kah hăng yă H Blim ƀơi plơi Mơnŭ, să Čư̆ Á. Gah sang anô̆ ƀun rin hăng tơlơi hơdip mơda tơnap tap, thun 2023 sang anô̆ ñu dưi hmâo gong gai plơi pla djru sa drơi rơmô rông. Hăng tơlơi bơwih brơi tŏng ten, truh ră anai rơmô hmâo tuh rai sa drơi ană, amra ba glăi prăk pơhrui glăi hơđong kơ sang anô̆ pơgi kơdih anai.

“Tơlơi hơdip sang anô̆ hlâo adih tơnap tap biă, yua ƀu hmâo đang hmua anun ƀu dưi pơđĭ kyar bơwih ƀong. Jê̆ hăng anai kơnang kơ hmâo tơlơi gum djru mơ̆ng gong gai ƀơi anai hmâo djru sang anô̆ rơmô rông, tơdơi hơdôm thun blan rông lĕ rơmô prong laih, čang rơmang amra tañ tuh ană, pioh tơlơi hơdip sang anô̆ ƀơƀrư̆ dưi pơplih lu hloh”.

Gah hơdră bruă djru gum, plơi prong Plei Ku hmâo pơsit laih Hră pơgang gah ia jrao kơ abih bang sang anô̆ ƀun rin hăng ƀun rin ƀơƀiă. Ană bă hơdôm bôh sang anô̆ anai dô̆ dưi nao hrăm hră ƀu apăh prăk hrăm. Yă Trần Thị Út, Kơ-iăng Khua Jơnum min mơnuih ƀôn sang phường Chi Lăng, plơi prong Plei Ku brơi thâo, mơnuih apăn bruă phường hmâo pơtô brơi neh wa pơplih hơdră phun pla lăp djơ̆, pok hơdôm anih pơhrăm hăng ngă gal brơi čan prăk mă kơmlai ƀiă:

“Gong gai phường hmâo hăng glăk đing nao hơdôm bruă mă djru pơđĭ kyar bơwih ƀong, pơđĭ dlông kơjăp bruă pơtô pơhrăm bơwih brơi tơlơi suaih pral hăng pơplih anom mă yua kơ 3 bôh plơi neh wa djuai ania ƀiă. Phường hmâo iâo pơthưr ƀing čơmah, thâo tơngiă djru pơdŏng brơi 7 bôh sang, neh wa pơđĭ dlông tơlơi hơdip mơda. Djru phun pla hăng hlô rông lăp djơ̆ hăng hơdôm tơlơi ƀơi 3 bôh plơi kiăng đĭ dong prăk pơhrui glăi hăng hơđong tơlơi hơdip mơda mơ̆ng mơnuih ƀôn sang”.

Plơi prong Plei Ku hmâo djru laih mơnuih gah hơdră bruă čan giăm truh 11 klai prăk hăng mă kơmlai ƀiă. Keh prăk yua kơ mơnuih ƀun rin ăt hmâo djru pơdŏng laih hăng pơkra glăi 95 bôh sang dô̆ hmâo nua rơbêh kơ 4 klai 700 klăk prăk. Hơdôm hơdră pơjing bruă mă dưi pok pơhai hăng prăk mă yua rơbêh kơ 770 klăk prăk... Ơi Nguyễn Triều Quang, Kơ-iăng Khua Sang prăk gah hơdră bruă mơnuih mơnam pơdŏng ƀơi Gia Lai pơtŏng sit amra đing nao ngăn rơnoh, biă ñu lĕ jơlan hơdră pơsir bruă mă kơ mơnuih ƀôn sang.

“Anom ăt pơphô klă mơn kơ Ping gah plơi prong, Khul khua pơ ala mơnuih ƀôn sang, Jơnum min mơnuih ƀôn sang ba prăk jao tơlơi gơgrong gah hơdră bruă ƀơi phường pioh brơi čan hăng mơnuih dưi čơkă mă ƀơi anai. Yap truh ră anai abih bang prăk brơi čan hơdôm jơlan hơdră hmâo 402 klai prăk, amăng anun prăk gah ngăn drăp gưl tơring čar hăng plơi prong lĕ 51 klai prăk, hmâo rơnoh ngă tui bruă jao brơi čan prăk gah hơdră bruă”.

Plei Ku hmâo pơdŏng laih sa jơlan hơdră ha jăn pioh pơtrut kơtang bruă hrŏ trun ƀun rin kơjăp phik, pơđĭ dlông tơlơi hơdip mơnuih ƀôn sang, biă ñu lĕ ƀơi hơdôm bôh plơi pla neh wa djuai ania ƀiă amăng rơwang 2021-2025. Bruă iâo pơhrui abih bang glông bruă kơđi čar gum hrŏm, gơgrong hlâo čih pơkra kơčăo bruă hrŏ trun ƀun rin sui thun hăng mă yua ba glăi bôh tơhnal ngăn rơnoh čan mơ̆ng hơdôm jơlan hơdră pơkă mơ̆ng dêh čar amra jing phun than kơ tơlơi truh kih amăng bruă hrŏ trun ƀun rin mơ̆ng plơi prong. Ơi Trịnh Duy Thuân, Khua git gai Ping gah plơi prong Plei Ku, brơi thâo:

“Mơ̆ng akô̆ rơwang bruă truh ră anai plơi prong hmâo đing nao git gai, črâo ba pok pơhai bruă hrŏ trun ƀun rin kơjăp nao hrŏm hăng hơdôm jơlan hơdră pơkă mơ̆ng lŏn ia hmâo laih sa dua bôh tơhnal klă. Mrô sang anô̆ ƀun rin amăng neh wa djuai ania ƀiă hăng mrô sang anô̆ ƀun rin lăi hrŏm hrŏ thun tañ. Anai lĕ tơlơi gir run prong biă mơ̆ng hơdôm gưl gơnong bruă nao hrŏm hăng bruă ngă tui hơdôm jơlan hơdră pơkă mơ̆ng lŏn ia”.

Hăng tơlơi gir run ƀu pơdơi, plơi prong Plei Ku glăk anăp nao giăm hloh tơhnal pơkă hrŏ trun ƀun rin kơjăp sui thun. Hơdôm hơdră bruă hăng jơlan hơdră djru gum hmâo ngă tui ba glăi bôh tơhnal, djru pơplih tơlơi hơdip mơnuih ƀôn sang, biă ñu neh wa djuai ania ƀiă./.