Jua čing ok or gah yŭ hơdôm ƀĕ phun kyâo pơprong ngă kơ črăn jơlan Trần Quang Khải, djeo tơdron lăk 10/3, plơi prong Ƀuôn Ma Thuột, tơring čar Dak Lak tơdu ƀiă tơlơi h’uh hang amăng adai bơyan phang pơ-iă kơtang hơdôm hrơi ngă lơphet pơdơi pơdă phrâo anai. Yŭ suang rơnang rơnĕ, tơngan hơdai lăng rơ-un muăn laih anun er tơlơi adoh đưm hmư̆ iơ̆k ba mơtam pơhưč pran jua ƀing tuai rơnguai hăng mơnuih ƀôn sang găn rơgao nao rai dŏ glăi ĕp lăng pơđing hmư̆. Yă Nguyễn Thị Oanh, tuai mơ̆ng tơring čar Nam Định lăi:

“Rai pơ anai ƀrô ƀuh arăng pơdah atông čing ring hơgor kual Dap Kơdư anun yơh dŏ glăi ĕp lăng. Hmư̆ jua čing hơgor kual Dap Kơdư hing ang biă mă yơh, amăng dêh čar ta kơnong kual Dap Kơdư đôč hơmâo čing hơgor mơak hloh. Jĭng čêng kual Dap Kơdư atông pơpă hai mơak kơdok kơdor soh”.

Hơdră pơdah adoh suang, atông čing hơgor hăng akŏ ñu “Lŏn ia mơak hlom bom” jing bruă mă yua Anom bruă Gru grua hiam-Pơrơguăt drơi jăn plơi prong Ƀuôn Ma Thuột pơphun ƀơi tơdron lăk tong krah plơi prong ƀrô ngă lơphet hơdor glăi lơ 30/4 hăng lơ 1/5 thun anai. Hăng črăn atông čing, pơdah gông brô̆, ting ning, ayup (iup) đing năm djuai ƀiă yua ƀing čơđai Ƀuôn Ky, Ƀuôn Kŏ Tam, khul adoh suang then plơi prong Ƀuôn Ma Thuột pơdah adoh suang hrŏm buh ao dai Việt Nam tơring čar Dak Lak, khul suang kơdưt Doremi Kid….hơmâo ngă rai hơdră tơlơi ngui ngor adoh suang mơak kơdok kơdor hloh. Ơi Trương Ngọc Bảy, dŏ pơ să Êa Kuăng, tơring glông Krông Pač, tơring čar Dak Lak nao ĕp lăng hơdră adoh suang, ñu lăi:

“Hơdôm djuai ania Êđê, Tày hăng lu djuai ania pơkŏn lêng kơ hơmâo gru grua hiam đưm phara soh mơ̆ng gơñu. Gru grua hiam đưm anun lăp pơ-ư ang biă mă hăng mơnuih ƀôn sang ta, yua kơ anun tơlơi jơnun ngui pơdah thâo tơdruă gru grua hiam brơi mơnuih ƀôn sang ƀing ta lăng kiăng thâo hluh kơ gru grua hiam hăng dưi pơlar prong tui lu hloh”.

Ƀu kơnong ƀơi tơdron lăk 10/3 đôč ôh, ƀrô djơ̆ hrơi ngă lơphet pơdơi pơdă ngui ngor lơ 30/4 hăng lơ 1/5 phrâo anai, lu anih anom hyu ngui čơkă tuai ƀơi Dak Lak lêng kơ pơphun bruă mă gru grua mơak adoh suang djă pioh gru grua djuai ania đưm kual Dap Kơdư, kah hăng: pơdah tơlơi ngui ngor atông čing hơgor, adoh then pĕ gông tính sa arăt hrĕ, pơkra ming gông brô̆ đưm, mơñum tơpai čeh, huă ƀong djop mơta mơnong ƀong huă mơ̆ng djuai ania Êđê, Bơnông, Lao,…ngă kơ ƀing tuai mơak hăng pơhưč pran jua hor či dŏ ngui hrŏm.

Ayong Lý Thế Quân, tuai mơ̆ng ƀông ƀôn prong Hồ Chí Minh brơi thâo, ñu ƀuh mơak biă mă hăng hơdră arăng atông čing pơtâo laih anun pĕ gông, ayup đing diăp, đing năm gru grua kual Dap Kơdư  ƀơi jơlan Đường Sách kơphê Ƀuôn Ma Thuột tal ñu nao ngui ƀơi Dak Lak bơyan anai.

“Kâo ƀuh lu hơdră tơlơi adoh dăp hơdră pơblih nao rai lu mơta, phara djuai ania pơhưč tuai hor ĕp lăng, pơdah thâo anŏ hiam gru grua đưm rim djuai ania, biă mă ñu gru grua djuai ania Êđê. Mơ̆ng anun, hmư̆ ƀing adoh, tơlơi adoh mơak, đok adoh rơđah rơđong lơlong, kah hăng tơ-ua amăng glai klô čư̆ siăng. Tơlơi anai yơh kâo ƀuh ƀơi lu anih pơkŏn ƀu hơmâo ôh”.

Ƀu kơnong ƀing tuai hyu ngui mơ̆ng tơring čar pơkŏn đôč ôh bơni, tơl mơnuih ƀôn sang dŏ amăng tơring čar Dak Lak hai ăt lăng hling hlang mơ̆n laih anun hor hăng tơlơi adoh suang, gru grua djuai ania kual Dap Kơdư dưi pơphun amăng hơdôm hrơi rơgao. Amai Trần Thị Đan Phương, dŏ ƀơi phường Tân Lập, plơi prong Ƀuôn Ma Thuột brơi thâo:

“Sa tal pơdơi pơdă sui hrơi samơ̆ sang anŏ gơmơi pơsit do glăi pơ Ƀuôn Ma Thuột, dŏ amăng sang đôč laih anun hyu ĕp lăng tơlơi ngui ngor gru grua jum dar ta. Giong anun ƀuh rơđah, jum dar anih ta dŏ hơmâo lu tơlơi mơak hiam klă djơh hăng anun. Čang rơmang tơring čar Dak Lak ƀing ta amra hơmâo lu hơdră hiam mơak hloh tui anun pơdah brơi kơ lu sang anŏ, yua hơmâo lu sang anŏ ƀu hơmâo tơlơi gêh găl laih anun gơñu kiăng ĕp lăng sem hơduah lu hloh samơ̆ ƀu ngă gơñu pơtah hơtai ôh yua ƀuh lu tơlơi ngui ngor anun mơak mơai biă mă”.

Sa boh kual lŏn hơmâo lu gru grua hiam hăng 49 djuai ania dŏ hrŏm, hrŏm hăng anŏ gêh găl mơ̆ng lŏn mơnai glai klô čư̆ siăng hiam yang brơi, anŏ kơđŏm gru grua đưm mơ̆ng djop djuai ania dŏ mơ̆ng đưm hlâo, hơmâo laih gru grua hiam phara hơjăn pioh čơkă tuai nao ngui pơ Dak Lak ĕp lăng. Pơđĭ tui anŏ gêh găl anun, ƀu kơnong amăng mông pơdơi pơdă đôč ôh, djop anom bruă čơkă tuai ƀơi Dak Lak hrơi blan rơgao hơmâo tuh rơyuh dăp pơkra bruă čơkă tuai, kiăng tuai dŏ hrŏm amăng plơi pla, ngui ngor ƀong mơñum hăng pô sang, hăng ană plơi pla, pơdah thâo djop mơta gru grua hơđăp hiam klă brơi kơ tuai lăng, hnun kah dưi djă pơkong, pơhưč tuai dŏ glăi sui hrơi, nao ngui lu wơ̆t hloh amăng tơring čar Dak Lak. Mơ̆ng hơdôm hơbô̆ bruă hiam anun pok brơi jơlan hơdră phrâo anŏ gêh găl kơ tuai hyu ngui amăng kual Dap Kơdư pok pơhai, brơi ba yua, pơdah thâo djop mơta gru grua hiam mơ̆ng đưm ană plơi pla, kiăng ngă anŏ pơhưč tuaiĕp lăng, apah anih dŏ glăi amăng plơi pla, djru blơi gơnam tam ană plơi sĭ glăi, hơgĕt mơnong mơnuă, gơnam tam amăng kual Dap Kơdư lu angin, pơ-iă ba sĭ brơi kơ tuai blơi djru hrŏm pơsir bruă mă bơwih ƀong huă hơđong kơ ană plơi pla.