Lu gơnam OCOP mơng tơring čar Dak Lak hơmâo pơsit tong anŏ hiam hơdjă, hơmâo lu mơnuih blơi yua ƀu djơ̆ kơnong amăng lŏn ia đôč ôh wŏt pơ tač rơngiao. Pơhmutu lĕ gơnam OCOP him lăng amra pơsit 5 asar pơtŭ anun lĕ mak ka Dak Lak mơng kông ti pơčruh ngăn Damaca Nguyên Phương, tơring glông Krông Năng. Găn rơgao lu tơlơi tơnap tap mơng blung a, hăng tơlơi gir run mơng ƀing gơñu, thun 2021, mak ka Dak Lak mơng kông ti dưi tŭ yap gơnam OCOP 4 asar pơtŭ. Tơdơi kơ 3 thun, găn rơgao lu wŏt sem lăng, ră anai gơnam anai hơmâo pơsit mă puang 100/100, hăng jing gơnam him lăng amra tŭ yap 5 asar pơtŭ mơng tơring čar. Tui yă Nguyễn Thị Thu Phương, Khua kông ti pơčruh ngăn Damaca Nguyên Phương, dong mơng hrơi gơnam hơmâo tŭ yap gơnam OCOP 4 asar pơtŭ, bruă sĭ mơdrô hơmâo pok prong lu anih.

“Gơnam sĭ mơdrô mơng Damaca Nguyên Phương hơmâo ba hyu sĭ pơ rơbêh 47 boh tơring čar, ƀôn prong ƀơi Japan. Laih dong glăk ba nao sĭ blung a pơ dêh čar Hàn Quốc. Ră anai ƀing gơmơi glăk mă bruă hăng sa, dua boh dêh čar dong hơmâo dêh čar Khač, hăng sa, dua boh dêh čar kual Arab čang rơmang pơ anăp anai amra hơmâo tơlơi gêh gal amăng bruă sĭ mơdrô gơnam”.

Ăt lĕ sa amăng hơdôm gơnam dong amăng hơdôm gơnam him lăng amra tŭ yap 5 asar pơtŭ mơng Dak Lak ba nao sem lăng gơnam OCOP gưl gơnong glông pơ anăp anai, Kơphê Chồn Kiên Cường mơng kông ti TNHH sa ding kơna Kiên Cường, plơi prong Buôn Ma Thuột, tơring čar Dak Lak glăk găn rơgao lu wŏt pơgiong klă tui. Gơnam anai hơmâo tŭ yap gơnam OCOP 4 asar pơtŭ mơng thun 2021. Hăng tơlơi rơkâo jai hrơi đĭ tui mơng mơnuih blơi yua, anom bơwih ƀong sĭ mơdrô kiăng tŏ tui pơplih hrưn đĭ kiăng djơ̆ hăng tơlơi kiăng mơng sĭ mơdrô amăng lŏn ia kah hăng sĭ pơ tač rơngiao. Ơi Hoàng Mạnh Cường, Khua anom bơwih ƀong sĭ mơdrô brơi thâo Kơphê Chồn Kiên Cường hơmâo ba sĭ mơdrô pơ dêh čar Japan, Hàn Quốc, Phillippines hăng Australia.

“Jai hrơi ƀing gơmơi kiăng ngă klă dong kah mơng pơhlôm kơdrưh hăng gơnam ba sĭ mơdrô. Dua dong lĕ, ră anai mơnuih blơi yua gơnam đing nao biă mă gơnam hiam hơdjă hluai tui hơdôm tal pơsit brơi. Hră pơsit gơnam OCOP anai ăt kiăng pơsit tong tơlơi ƀuăn hăng kiăng ngă brơi djơ̆, klă hloh lơm hơmâo arăng pơsit brơi. Mơng anun pơtrut pơsur sĭ mơdrô gơnam brơi klă ƀiă dong”.

Dak Lak ră anai hơmâo 237 gơnam OCOP mơng 3-4 asar pơtŭ, 2 gơnam him lăng amra đĭ 5 asar pơtŭ. Tui ơi Nguyễn Hoài Dương, Khua gơnong bruă ngă hmua hăng pơđĭ kyar ƀon lan tơring čar, anai lĕ mrô jŭ yap dŏ aset hăng tơring čar hơmâo lu tơlơi gal amăng ngă hmua, ƀon lan kar hăng Dak Lak. Kiăng ngă tui klă tui tơlơi gal, pơ anăp anai, gơnong bruă ngă hmua hăng pơđĭ kyar ƀon lan amra gum hrŏm hăng hơdôm gơnong bruă bơdjơ̆ nao tŏ tui djru brơi hơdôm anih anom hơmâo gơnam OCOP hrưn đĭ klă dong, kah hăng pơđĭ kyar gơnam phrâo tui hơdră mơng pla pơjing, pơkra hăng sĭ mơdrô, anăp nao tŭ yap gơnam OCOP gưl dêh čar.

“Gơnong bruă ngă hmua lêng kơ hơmâo jơlan hơdră, akŏ bruă kiăng hrŏm hăng ƀon lan djru pơjing kual pla pơƀut ha anih, pơphun glăi bruă pla pơjing kiăng kơ hơmâo hră pơsit, thâo tong ten anih pla pơjing anăp nao pơhlôm brơi hiam hơdjă, wai pơgang jum dar, djơ̆ hăng tơlơi rơkâo khhut khăt mơng hơdôm boh dêh čar anun lĕ Japan ƀudah kual Mi kô̆”.

Ƀing ta ăt ƀuh hơdôm anom bruă hơmâo gơnam OCOP ƀơi Dak Lak glăk gơgrong ba gơnam đang hmua mơng ƀon lan nao sĭ djop anih, Dak Lak ăt čang rơmang hơdôm gơnam pla lu hloh anun lĕ kơphê, tiu, ca cao, pơdai, mak ka…lơm tŭ yap gơnam OCOP 5 asar pơtŭ dưi tŭ mă djop tơlơi dưi mơng tơlơi pơkôl sĭ mơdrô rơngai phrâo mơ̆ Việt Nam glăk lĕ ding kơna kiăng tŭ mă hăng sĭ mơdrô ƀơi hơdôm anih anom amăng rŏng lŏn tơnah./.