Ƀơi mông ngă lơphet hơdor 30 thun Hrơi akŏ pơdong tơring glông, khua mua tơring glông Đăk Hà, tơring čar Kon Tum pơsit, tŏ tui bruă akŏ pơdong plơi pla Đăk Hà jai hrơi pơdrong sah, rơgơi, ană mơnuih Đăk Hà “Gum pơgôp, hơdeč hmar, pơčeh phrâo, jê̆ giăm, thâo djru nao rai”; akŏ pơdong tơring glông Plơi pla phrâo amăng thun 2025 djơ̆ hăng anăn pơpŭ Tơhan sông kơtang mă bruă rơnuk pơplih phrâo mơ̆ thun 2008 Ping gah, Kơnuk kơna pơpŭ bơni.

Kiăng dưi ngă tơring glông plơi pla phrâo blung a mơ̆ng tơring čar Kon Tum amăng thun 2025, tơring glông Đăk Hà hơmâo lu hơdră ngă bruă, amăng anun pơƀut mă yua klă tơlơi gêh gal, tơlơi dưi či pơđĭ kyar sĭ mơdrô - bơwih brơi pơlir hăng bruă pơkra gơnam hơmâo nua; pơđĭ kyar tuai čuă ngui amăng plơi pla, čuă lăng anih anom glai klô, čuă lăng đang hmua jing tơlơi bơwih ƀong phun.