Gah yŭ kyâo tơ-ui amăng lan sang hră gưl dua Tô Vĩnh Diện, plơi prong Buôn Hồ, tơring čar Dak Lăk, sa grup čơđai glăk dŏ pơđok hră ƀơi giăm rơdêh prong kơñĭ hăng anăn “Sang pơđok hră bơyan bơnga”. Mah adai pơ-iă, hơ-uh biă mă, hơmâo ring rai ur ngañ, jua pơhiăp, tlao, ngui ngor jum dar anun, samơ̆ ƀing čơđai ăt dŏ gir pơđok mơn.

Phrâo pơđok giong hră pơtưh “Ih hơdip bĕ tơlơi hơdip mơ̆ng rok”, adơi H Sơ Mi Mlô, hrăm anih 7A3 mă sa pok hla pơ-ar čih glăi tơlơi pơmin mơ̆ng ñu kơ hơdrôm hră ñu phrâo pơđok, giong anun ba nao pơ pô wai lăng či mă gơnam arăng ƀơk. H Sơ Mi Mlô lăi, ñu lăng rơdêh pơgiăng hyu hră anai mơ-ak biă, amăng rơdêh hơmâo lu hơdrôm hră wơ̆t hăng gơnam ngui dong.

“Kâo khăp biă kơ anih pơđok hră anai yua dah hơmâo lu hơdrôm hră akhan, hơmâo lu hơdrôm hră či hrăm. Kâo rai pơ anai pơđok hră ră ruai glăi tơlơi hơdip, pơđok hră akhan, hơmâo lăng lu hră djru kơ bruă hrăm ăt kah hăng kiăng akŏ dlô mơ-ak ƀiă”.

Ƀu kơnong hơmâo brơi hăng pơđok hră đôč ôh, ƀing čơđai sang hră ăt hơmâo ƀơk brơi gơnam hăng ngui ngor dong kah hăng ngui cờ vua, we rup, man tò te, pơkra kơđuh hră hăng hla pơ-ar carton...Amai Phạm Khánh My, dŏ ƀơi plơi prong Buôn Ma Thuột, tơring čar Dak Lăk, pô wai lăng rơdêh “Sang pơđok hră bơyan bơnga” lăi: hăng tơlơi čang rơmang kiăng hơmâo tơlơi ngui ngor, sem lăng mơ-ak hloh hăng ƀing čơđai pơ kual tơnap tap, kual ataih yaih ƀơi Dap Kơdư hơmâo ƀuh hăng pơđok lu hơdrôm hră, mơ̆ng thun 2020, Kông ti djru mơnuih mơnam Bồ Công Anh (plơi prong Buôn Ma Thuột) ngă hrŏm hăng ƀing djru khăp pap pơphun ngă kơčăo bruă hăng anăn “Sang pơđok hră glăi pơ plơi pla”. Tơdơi kơ 2 thun, sang pơđok hră anai jing hơdeč hmar hloh lơ̆m hơmâo rơdêh pơgiăng gơnam pơhrup hiam, pơgiăng hyu djŏp mơta hơdrôm hră, gơnam ƀơk, gơnam ngui ngor glăi pơ djŏp plơi pla, sang hră anet pơ kual ataih yaih mơ̆ng tơring čar Dak Lăk, Gia Lai, Kon Tum, Dak Nông. Mơ̆ng anai, “Sang pơđok hră glăi pơ plơi pla” pơplih jing anăn phrâo “Sang pơđok hră Bơyan bơnga”.

Ăt tui hăng amai Phạm Khánh My mơn, truh ră anai, rơdêh pơgiăng “Sang pơđok hră Bơyan bơnga” hơmâo nao pơ 50 boh sang hră anet amăng plơi, djru ba rơbêh 15.000 čô čơđai dưi pơđok hăng ngui ngor. Hrŏm hăng anun, grup pơphun bruă hơmâo ƀơk brơi rơbêh 12.000 sŏp hră pơmut amăng hip pioh hră ƀơi hơdôm boh sang hră gơñu nao.

“Kiăng ƀing adơi pơđok hră, amăng rơdêh juăt prăp lui gơnam ƀơk brơi kiăng gơñu hơmâo pran. Lơ̆m ƀing čơđai pơđok giong lĕ čih glăi tơlơi gơñu pơmin, pơđok hră mơ-ak hă ƀŭ, ta djă lui hră gơñu čih, giong anun ƀơk gơnam brơi ƀing gơñu, ƀơk brơi hră čih anet, gai čih, ƀudah djŏp mơta gơnam hơmâo amăng rơdêh, wơ̆t hăng hơdrôm hră hai gơmơi brơi mơn”.

Ƀơi Dak Lăk, kiăng bang hyu hăng pơđĭ tui bruă pơđok hră, mơ̆ng thun 2017, Jơnum min mơnuih ƀôn sang tơring čar hơmâo pơtrun akŏ bruă “Pơđĭ kyar boh thâo pơđok hră amăng kual plơi pla truh pơ thun 2020, anăp nao thun 2030 ƀơi tơring čar Dak Lăk”. Tơlơi gơñăm nao jing truh pơ thun 2030, ngă gêh gal brơi kiăng mơnuih ƀôn sang triang pơđok hră, hmư̆ tơlơi pơhing, thâo phô ƀơi anih dŏ hơdip, hrăm hră, mă bruă. Kơčăo bruă anai hơmâo tơring čar pơphun ngă hăng lu bruă pơplông, ngui ngor sit nik. Ơi Ngô Trung Vinh, Khua anom bruă gru grua pôr pơhing tơring glông Krông Ƀuk, tơring čar Dak Lăk brơi thâo hơdră ngă bruă mơ̆ng tơring čar:

“Ngă hrŏm hăng hơdôm anom bruă, biă ñu lĕ hơdôm boh sang hră pơphun hrơi hơdrôm hră hăng boh thâo pơđok hră; pơphun lu bruă jơnum ngui tui hluai kơ anŏ hơmâo, anun lĕ dăp hră kiăng tơpă, djơ̆ anih, brơi čơđai pơđok hră giong anun hơmâo bruă pơkŏn yôm anăp nao ƀing čơđai, pơtô brơi ƀing čơđai kơ gru grua, boh thâo ăt kah hăng boh thâo pơđok hră.

Tui hăng ơi Trương Hoài Anh, Khua gơnong bruă pôr pơhing tơring čar Dak Lăk, hăng tơlơi gum hrŏm mơ̆ng hơdôm anom bruă, anom bơwih ƀong, Hrơi hơdrôm hră hăng boh thâo pơđok hră rim thun jai hơmâo lu tui hơdrôm hră hloh, hơmâo ba nao tơl sang hră kual ataih yaih amăng tơring čar, djru pơđĭ tui boh thâo pơđok hră pơ plơi pla. Hrŏm hăng pơđok tui đưm hlâo, bruă mă yua boh thâo mrô amăng pơđĭ kyar boh thâo pơđok hră amra pơtrut ngă pơhưč lu hloh mơnuih ƀôn sang, biă ñu lĕ ƀing čơđai anet, čơđai sang hră.

“Amăng rơnuk mă yua boh thâo 4.0, ƀing ta čang rơmang abih bang gum pơtrut tui hloh, ƀu kơnong amăng hơdrôm hră tui hơđăp đôč ôh mơ̆, hơdôm boh thâo măi mok, glông pôr pơhing, djŏp djuai hơdrôm hră đah mơ̆ng bang hyu hloh amăng tơlơi hơdip, jing kual mơnuih mơnam hrăm hră. Kiăng dưi ngă bruă anai, tơring čar, tơring glông, abih bang gong gai mơ̆ng ngŏ truh pơ yŭ lêng kơ gum ngă, bang hyu amăng tơlơi hơdip, sit nik bruă pơđok hră jing bruă hơmâo ngă na nao amăng tơlơi hơdip mơnuih ƀôn sang”.

Hăng anih pioh hơdrôm hră pơđok mơ̆ng tơring čar truh pơ plơi pla, hip pơđok hră tơlơi phiăn, hip hơdrôm hră ƀơi sang dăng kông - sang gru grua să, hip pioh hơdrôm hră ƀơi Puih kơđông tơhan, hrŏm hăng lu sang pơđok hră ba hyu truh pơ plơi pla, sang hră pơ Dak Lăk, ƀơ ƀrư̆ klă tui, bơwih brơi tơlơi kiăng pơđok mơ̆ng mơnuih ƀôn sang, biă ñu lĕ ƀing čơđai pơ kual ataih yaih, kual guai dêh čar, plơi pla tơnap hloh. Mơ̆ng anun djru boh thâo pơđok hră jai hrơi bang hyu hloh./.