Truh mơmŏt mlăm, sa grup gum djru ƀơi tơring čar Gia Lai ječ ameč hăng bruă pơka ming jơlan. Ayong Lê Tuấn Thành, pô ngă akŏ grup gum djru brơi thâo, hlâo pơkra ming hơdôm anih răm rai, grup hơmâo pel ĕp hlâo hăng rơkâo gong gai, pơtrut pơsur gum pơgôp prăk kak pioh pơkra ming jơlan. Bruă pơkra ming pơphun amăng mơmŏt mlăm yua rơdêh đuăi nao rai lu amăng tơhrơi.

“Bruă anai kiăng djru brơi mơnuih mơnam hăng ngă lar hyu hơdôm tơlơi hiam klă tơl abih bang mơnuih, sit biă ñu lĕ ƀing hlăk ai čơđai. Ngă tui hăng pok pơhai “Glông jơlan rơnuk rơnua” lĕ pơkra ming anih pơčah răm rai kiăng pơhlôm brơi mơnuih ƀôn sang gêh gal găn nao rai”.

Lơm grup gum djru pơphun bruă mă, mơnuih ƀôn sang ăt abih pran jua djru brơi hăng bruă tol yol apui kơđen rơđah bơngač, ƀô̆p ia luk simăng hăng brơi ia mơñum, gơnam ƀong brơi ƀing mơnuih glăk djru pơkra jơlan. Ơi Nguyễn Văn Thuyết, khua ƀut plơi 10, phường Ia Kring brơi thâo.

“Jơlan glông ƀơi anai lu anih răm rai, ngă neh met wa tơnap nao rai, hrơi anai hơmâo hlăk ai gum djru kiăng pơkra ming hơdôm anih pơčah răm rai ngă neh met wa hok mơ-ak biă mă. Čang rơmang ƀing hlăk ai tŏ tui djru brơi neh met wa kiăng pơhlôm jơlan nao rai hiam hruaih”.

Ƀu djơ̆ kơnong pơkra ming jơlan ƀơi Pleiku đôč ôh grup gum djru anai ăt pơkra ming lu ară jơlan ƀơi hơdôm boh tơring glông amăng tơring čar Gia Lai. Hok mơ-ak lơm jơlan hơmâo pơkra ming hiam hruaih, ayong Trần Trọng Trung, mơnuih dŏ hơdip amăng să Ia Yok, tơring glông Ia Grai brơi thâo.

“Jơlan răm rai kơtang biă mă, tơnap nao rai, đa ƀuh hơmâo mơnuih rơbuh trun amăng čroh ia. Grup gum djru nao pơkra ming ngă kơ neh met wa hok mơ-ak, hăng ăt nao djru brơi mơn”.

Jơlan hơdră “Glông jơlan rơnuk rơnua” hơmâo pok pơhai dong mơng blan 9/2023, truh ră anai hơmâo ngă tui 19 wŏt amăng pơkra ming jơlan amăng plơi pla glông 30 km ƀơi hơdôm boh tơring glông Ia Grai, Đăk Đoa hăng plơi prong Pleiku, tơring čar Gia Lai. Jơlan hơdră hơmâo pơhưč hơdôm rơtuh čô mơnuih mut hrŏm. Yă Lê Kiều Thị Minh (dŏ amăng să Tân Sơn, plơi prong Pleiku)-ding kơna amăng grup anai brơi thâo:

“Kâo hrŏm hăng ană đah rơkơi mut hrŏm grup “Glông jơlan rơnuk rơnua” djru pơkra ming hơdôm ară jơlan hiam hruaih kiăng abih bang mơnuih nao rai gêh gal, ngă lar hyu hơdôm bruă mă hiam klă amăng mơnuih mơnam, hăng pran jua gum djru brơi mơnuih mơnam”.

Mah bruă pơkra ming jơlan glông pơgiong amăng mơguah sing bring, ƀing mơnuih djru bruă lêng kơ hok mơ-ak soh. Jơlan hơdră “Glông jơlan rơnuk rơnuk” ƀu djơ̆ kơnong pơgôp ngă hiam tui hơdôm ară jơlan amăng plơi pla, pơhlôm rơnuk rơnua đôč ôh mơ̆ ăt ngă lar hyu tơlơi hiam klă, pơgôp pơjing tơlơi hơdip pơlir hơbit./.