Amăng sang dô̆ phrâo pơdŏng klă hiam, amai Nguyễn Thị Lệ Thu ƀơi Grŭp mơnuih ƀôn sang dô̆ mrô 4, phường Tân Hòa, plơi prong Buôn Ma Thuột, tơring čar Dak Lak brơi thâo, kâo lĕ sa čô mơnuih rông 3 čô ană ha jăn, lu thun khom kơnang kơ yă ñu. Sang phrâo prong giăm truh 40 met kơ rê hmâo djru 4 čô amĭ ană hmâo sang dô̆ pơđao sit nik:

“Hlâo adih dô̆ kơnang kơ sang yă kâo, hơjan thơ ƀlĕ brêp brap, pơ-iă lĕ hang hơhik hăng ƀui hlŭ amĭ ană gơmơi dô̆ tơnap tap biă. Ding jum Kông ang ƀơk brơi sang dô̆, 4 amĭ ană gơmơi hmâo sang dô̆ pơgang pơ-iă, pơgang hơjan anun mơ-ak biă, ƀu bơngot kơ ia hơjan ƀlĕ ƀudah pơ-iă hang dong tah. Drơi pô kâo ƀu hmâo prăk pơhrui glăi hơget mơn lăi nao hơget kơ bruă pơdŏng sang tui anai".

Sang anô̆ amai H’ Nuân Knul lĕ sa amăng hơdôm bôh sang anô̆ ƀun rin hloh buôn Tiêu, să Ea Tiêu, tơring glông Čư̆ Kuiñ, tơring čar Dak Lak. Ñu brơi thâo, sang anô̆ hmâo 6 čô mơnuih samơ̆ ƀu hmâo lŏn ngă đang hmua ôh, tơlơi hơdip mơda kơnong kơ kơnang kơ hyu mă bruă arăng mơ̆ng dua rơkơi bơnai. Yua kơ tơlơi hơdip sang anô̆ tơnap tap anun ñu khom dô̆ amăng sang pơdŏng mă tơ̆i rơ̆i. H’ Nuân hmâo pơmin lĕ, sang anô̆ pô amra ƀu thâo hơbin ôh dưi pơdŏng sa bôh sang dô̆ pơhlôm pơgang pơ-iă, hơjan, samơ̆ ră anai, ñu glăi hmâo hĭ sa bôh sang xi-măng:  

“Hlâo adih, rơkơi bơnai blơi sang pơkra hăng hnal kyâo hăng nua 3 klăk prăk, samơ̆ ră anai hnal kyâo hăng tôl răm tui abih laih. Laih anun bơnah kông ang rai pơdŏng brơi sang dô̆ phrâo klă hiam, 6 čô mơnuih dô̆ amăng sang phrâo mơ-ak biă, ƀu bơngot dong tah. Ră anai rơkơi bơnai kâo kơnong kơ pơmin nao kơ bruă bơwih ƀong huă čem rông ană bă hrăm hră”.

Tui hăng ơi Hồ Viết Hùng – Kơ-iăng Khua Jơnum min mơnuih ƀôn sang să Ea Tiêu, tơring glông Čư̆ Kuiñ, Akô̆ bruă mơ̆ng Kông ang ƀơi să hmâo 22 bôh sang anô̆ tơnap tap kơ sang dô̆ hmâo jao sang dô̆ khăp pap. Abih bang prăk yua pơdŏng 1 klai 760 klăk prăk. Ră anai hơdôm bôh sang anô̆ leng kơ hmâo čơkă mă bruă jao sang dô̆ hăng đĭ dô̆. Bruă djru sang dô̆ ƀu kơnong kơ djru hơdôm bôh sang anô̆ “Hơđong anih dô̆ pơjing bruă mă pơhlôm" ôh mơ̆, dô̆ djru plơi pla ngă giong tơhnal pơkă sang dô̆ amăng pơdŏng plơi pla phrâo. Ơi Hồ Viết Hùng brơi thâo:

“Ră anai mrô hrŏ trun sang tơ̆i ƀơi să phun ñu pơhlôm laih bơhmu hăng tơhnal ba tơbiă, djru bruă pơdŏng plơi pla phrâo mơ̆ng să. Lơm dưi djru sang dô̆, neh wa mơ-ak biă, hơđong pran jua hơdip mơda pơđĭ kyar bruă ngă đang hmua bơwih ƀong sang anô̆, djru pơdŏng hăng pơđĭ kyar să kơjăp kơtang”.

Rơwang mơ̆ng 2022-2025 tơring čar Dak Lak hrưn đĭ pơdŏng rơbêh kơ 5.000 bôh sang dô̆ djru hơdôm bôh sang anô̆ ƀun rin, ƀun rin ƀơƀiă, sang anô̆ gah hơdră bruă, sang anô̆ neh wa djuai ania ƀiă tơnap tap kơ sang dô̆. Akô̆ bruă pơdŏng 1.200 bôh sang dô̆ khăp pap mơ̆ng Ding jum Kông ang lĕ djru ba prong biă, djru tơring čar dưi ngă giong tơhnal ba tơbiă laih. Ơi Lê Bá Cảnh – Kơ-iăng Khua Jơnum min djop djuai ania mơnuih mơnam dêh čar Việt Nam tơring čar Dak Lak brơi thâo, lơm tŭ mă akô̆ bruă mơtăm, Jơnum min djop djuai ania mơnuih mơnam dêh čar hơdôm gưl ƀơi tơring čar hmâo gum hrŏm hăng gơnong bruă kông ang, gong gai plơi pla, pel ĕp, ruah mă, čih anăn mơnuih dưi čơkă mă bruă pơdŏng brơi sang dô̆ kơ hơdôm bôh sang anô̆ mơnuih ƀôn sang. Abih bang 1.200 bôh sang dô̆ dưi jao laih hăng hơdôm bôh sang anô̆ hmâo đĭ dô̆ laih. Pơ̆ anăp anai, Jơnum min djop djuai ania mơnuih mơnam dêh čar Việt Nam tơring čar Dak Lak iâo pơhrui hơdôm ngăn rơnoh mơnuih mơnam pioh ngă tui kơčăo bruă pơdŏng pơjing mrô sang dô̆ glăi jao brơi hơdôm bôh sang anô̆ mơnuih ƀôn sang.

“Ƀing gơmơi pok pơhai dong pơdŏng sang djru mơnuih tơnap tap kơ sang dô̆ hăng čang rơmang hơdôm gơnong bruă, khul grŭp, hơdôm grŭp ƀudah ƀing thâo rơngia čơmah amăng hăng gah rơngiao kơ tơring čar gum hrŏm dong hăng tơring čar Dak Lak djru mơnuih ƀôn sang amăng tơring čar kơƀah sang dô̆. Ngă hiưm hơpă amăng rơwang 2022-2025, pơhlôm ngă giong tơhnal pơkă pơdŏng rơbêh kơ 5.000 bôh sang dô̆, djru mơnuih tơnap tap kơ sang dô̆ rơwang anai ƀơi tơring čar”.

Akô̆ bruă mơ̆ng Ding jum Kông ang, pơdŏng 1.200 bôh sang dô̆ brơi hơdôm bôh sang anô̆ tơnap tap, sang anô̆ gah hơdră bruă, sang anô̆ neh wa djuai ania ƀiă ƀơi tơring čar Dak Lak, dưi pok pơhai mơ̆ng blan 3/2024 hăng pơkra giong laih amăng rơnuč blan 7/2024. Abih bang prăk mă yua kơ akô̆ bruă lĕ 96 klai prăk, amăng anun prăk djru mơ̆ng Ding jum Kông ang lĕ 60 klai prăk, mrô dô̆ glăi yua kơ tơring čar pơalin hrŏm. Rim sang pơdŏng prong 36 met kơ rê, hăng pơnăng sang xi-măng, bơbung tôl, atur geč men, hmâo nua 80 klăk prăk. Ră anai 1.200 bôh sang anô̆ hmâo đĭ dô̆ laih, mơ̆ng anun djru tơring čar Dak Lak hrŏ trun sang tơ̆i, hrŏ trun ƀun rin, gum djru ba lơm tơnap hăng neh wa djuai ania ƀiă, djru mơnuih ƀôn sang hơđong pran jua bơwih ƀong huă, gum hrŏm hơbit pơdŏng bruă bơwih ƀong, plơi pla phrâo hăng pơgang rơnuk rơnua plơi pla lŏn ia. Sa akô̆ bruă prong, samơ̆ ngă giong kơnong amăng rơbêh kơ 4 blan ăt brơi ƀuh tơlơi tuh pơplai tơpă, gum hrŏm ba glăi bôh tơhnal mơ̆ng hơdôm gưl gơnong bruă./.