Hneč (mơneč) mă mông pơdơi yang hrơi dong, nao ĕp lăng đang añăm mơtah hlơ hlip hăng pơbŭ glăi bôk đang añăm, pla tơrong dô pơboh brŭng brăng, pioh jao glăi kơ ƀing sĭ mơdrô hyu blơi, mơnuih ping gah Ya Dũng, Khua plơi Labouye A, să Lạc Xuân, tơring glông Đơn Dương, tơring čar Lâm Đồng lăi, hơdôm hrơi hăng anai, djop pô gun bruă soh, ta ăt khom nao ĕp lăng đang hmua hneč mă amăng tơhrơi, yang hrơi dong, či tlam lĕ pioh jơnum mơnuih ping gah amăng plơi, khul ping gah lơ̆m plơi pla kiăng pơčrong sai kơ bruă man pơdong plơi pla phrâo hiam hloh.

Ya Dũng brơi thâo, yua ƀuh bruă pla añăm pơtam tui hơdră juăt ngă mơ̆ng sang anŏ hăng mơnuih ƀôn sang amăng plơi ƀu ba glăi boh tŭ yua lu ôh, rơnoh pơhrui glăi ƀu hơđong anun yơh ñu khut khăt pơblih ngă tui hơdră phrâo, pla añăm pơtam pioh sĭ mơdrô, anun lĕ ba yua boh thâo ia rơgơi phrâo kơ bruă ngă hmua pla pơjing. Yua kơ anun 4 ar đang añăm ñu pla pioh sĭ lĕ, hơmâo pơhrui glăi lu, rim bơyan pĕ sĭ hơmâo truh 100 klăk prăk. Tui hăng Ya Dũng, mơ̆ng boh tơhnal anai ƀing ta dưi djru pơtô brơi mơnuih ƀôn sang, jak iâu ană plơi ngă tui hăng ƀuh gơñu kiăo tui kơ ta tŭ yua biă mơ̆n:

“Drơi jăn ta pô khom hyu ĕp lăng hrăm tui pơ lu anih, ƀu kơnong pơ anai ôh, dŏ hyu lu anih pơkŏn lăng hăng hrăm tui. Lăng arăng ngă đang, pla añăm pơjeh anai, djuai adih. Hăng ta lĕ pô ngă mơnuih pơ ala brơi mơnuih ƀôn sang anun kâo gir run hyu hrăm, tơña lăng, ngă tui hơdră phrâo pla añăm pơtam, pơblih pơjeh pla kah hăng ră anai, ngă tui hơdră phrâo soh. Yua kơ ană plơi kiăng gum hrŏm  pơdong plơi pla ala ƀôn ƀrư̆ hrơi pơđĭ kyar đi nao pơ anăp”.

Ƀôn Labouye A, să Lạc Xuân, tơring glông Đơn Dương, tơring čar Lâm Đồng hơmâo 130 boh sang anŏ, 70% amăng mrô anun djuai ania K’Ho. Mơ̆ng hơbô̆ bruă ngă hlâo tŭ yua sang anŏ Ya Dũng pô ngă, mơnuih ƀôn sang amăng ƀôn hrăm hăng hla tui. Truh tơ tă anai, abih bang đơ đam đang hmua pla añăm pơtam amăng plơi hơmâo ngă tui hơdră pla añăm pơtam, hơbơi, boh čroh (troh) djop mơta ba sĭ mơdrô soh. Rơnoh pơhrui glăi pơkă hăng hlâo adih đĭ tui anun lu sang anŏ pơklaih laih mơ̆ng sang anŏ ƀun rin hăng hrưn đĭ ngă pơdrong kiăng hơđong tơlơi hơdip mơda, hơdră bơwih ƀong huă.

Ya Dũng brơi thâo, truh ră anai, tơlơi pơmin, hơdră mă bruă mơ̆ng mơnuih ƀôn sang ƀôn Labouye A pơblih lu laih pơkă hăng hlâo. Ană plơi pla thâo ba yua boh thâo ia rơgơi amăng bruă ngă hmua pla pơjing, hơmâo ba glăi boh tơhnal tŭ yua lu. Pơ anăp adih, Ya Dũng pơtô brơi mơnuih ƀôn sang pla pơjing tui hăng hră rơkâo blơi,  kĭ pơkôl mơ̆ng sang bruă sĭ mơdrô, sang bruă pơkra ming gơnam sĭ mơdrô kiăng hơmâo anih sĭ mơdrô hơđong.

“Kơnong drơi jăn ta pô pơ anăp anai amra hyu sem lăng hrăm tui mut ngă ding kơna Khul ngă hrŏm bơwih ƀong huă, kiăng pơhlôm hơđong gơnam sĭ mơdrô, giong anun jak iâu mơnuih ƀôn sang mut ngă ding kơna sang bruă ngă hrŏm. Hơmâo, laih mut ngă ding kơna anom ngă hrŏm, hơmâo tơlơi lir hơbit mă  bruă  djop mơnuih amra gum hơbit mă bruă pơđĭ kyar  hloh”.

Tui hăng mơnuih ping gah ơi Cruyang Cơi Long, kơ-iăng khua hơđăp git gai ping gah să Lạc Xuân, tơring glông Đơn Dương, Lâm Đồng lăi, Ya Dũng ƀu kơnong mơnuih bơwih ƀong huă thâo rơgơi đôč ôh, ñu dŏ jing mơnuih ba jơlan hlâo amăng djop bruă să, tơring glông pơtrun, boh nik ñu amăng bruă djru lui rơmŏn kŏn rin, gum tơngan hrŏm man pơdong plơi pla phrâo.

“Kâo ƀuh Ya Dũng lĕ sa čô mơnuih ping gah ba gru hlâo, ba akŏ na nao amăng bruă ngă tui hăng jak iâu mơnuih ƀôn sang amăng plơi pla ngă djơ̆ tơlơi phiăn kơnuk kơna. Biă mă ñu, Ya Dũng gir run hyu ĕp hrăm tui, ba yua boh thâo ia rơgơi phrâo amăng bruă ngă hmua pla pơjing, giong anun brơi mơnuih ƀôn sang hla tui laih anun hơmâo ba glăi boh tŭ yua biă mơ̆n, djru hrŏm amăng bruă man pơdong plơi pla phrâo, jai hrơi pơđĭ kyar hloh”.

Hăng boh tơhnal dưi ngă laih, hơdôm thun rơgao, Ya Dũng hơmâo tŭ mă lu pok hră apah bơni mơ̆ng anom bruă ping gah să, tơring glông, tơring čar laih anun hră apah bơni mơ̆ng Khua sang bruă git gai kual Dap Kơdư yua kơ hơmâo ngă bruă ba glăi lu boh tŭ yua kơ ană plơi pla, man pơdong plơi phrâo, ƀôn ƀut hơđong kjăp.