Tơdơi kơ rơbêh 2 thun pok pơhai tơlơi pơtrun mrô 749 mơng Khua dêh čar, truh ră anai 60% hră pơ-ar gưl să amăng tơring čar Kon Tum hơmâo ngă brơi amăng plang internet, djơ̆ hơnong pơkă ba tơbiă truh thun 2025. Laih dong, rơbêh 16.800 ektar phun pla, 142 boh drông war hơmâo mă yua boh thâo phrâo; rơbêh 116.600 boh sang anŏ ba gơnam đang hmua sĭ amăng plang sĭ mơdrô điện tử; hơbô̆ bruă ƀut plơi pla 3, să Tân Lập, tơring glông Kon Rẫy pơhlôm brơi djop tơlơi gal jing plơi pla rơgơi…Samơ̆, tui ơi Đặng Trần Huân, Kơ-iăng khua gơnong bruă ngă hmua hăng pơđĭ kyar ƀon lan tơring čar Kon Tum, tơring čar ăt glăk dong ƀơi anăp kơ lu tơlơi lông lơm ngă tui bruă pơplih yua boh thâo phrâo amăng man pơdong plơi pla phrâo:

“Bruă hluh rơđah kơ mă yua boh thâo phrâo amăng man pơdong plơi pla phrâo aka ƀu bơkơnar. Bruă mă hăng boh thâo mơng ƀing apăn bruă lơm ngă tui bruă jao amăng pơplih phrâo dŏ kơƀah. Anih anom hăng măi mok amăng sa, dua boh să aka ƀu djơ̆ hăng tơlơi rơkâo hăng bruă jao pơplih yua boh thâo phrâo”.

Hăng 68% mrô mơnuih amăng tơring čar dŏ hơdip amăng plơi pla ala ƀon hăng 73% mrô mơnuih mă bruă amăng ngă hmua, đang glai, tơring čar Kon Tum pơsit tong pơplih yua boh thâo phrâo lĕ hơdră bruă phun kiăng pơđĭ kyar ngă hmua, kual plơi pla tui jơlan gah pơplih phrâo djru brơi mơnuih ngă hmua dưi bơwih ƀong tuh pơ alin aset ƀiă samơ̆ pơhrui glăi lu hloh.

Tui ơi Đặng Thanh Long, Khua khul pơlir hơbit hơdôm grup boh thâo ia rơgơi tơring čar Kon Tum, yua tơlơi bơwih ƀong huă-mơnuih mơnam dŏ tơnap tap, bruă pơplih yua boh thâo phrâo amăng ngă hmua hăng kual plơi pla amăng tơring čar kiăng găn rơgao hơdôm tơlơi gun, anun lĕ bruă mă yua măi mok dŏ aset, aka hơmâo boh thâo phrâo, hơdôm bruă ngă hmua ăt dŏ kiăo tui tơlơi găn rơgao mơng mơnuih ngă hmua…Lăi nao kơ hơdră pơtrut pơplih yua boh thâo phrâo amăng ngă hmua anăp nao pơđĭ kyar kual plơi pla rơgơi, ơi Đặng Thanh Long brơi thâo:

“Blung hlâo lĕ bruă pơtô pơblang kiăng hluh rơđah tơlơi gơgrong, tơlơi glăm ba, tơlơi yôm hăng glêh tơnap amăng pơplih yua boh thâo phrâo amăng pơđĭ kyar bơwih ƀong huă ngă đang hmua, anai lĕ tơlơi khŏm ngă tui. Pơtô hrăm brơi klă dong mơnuih mă bruă wŏt ƀing ngă pô amăng bơwih ƀong, hơmâo hơdôm boh sang anŏ, grup ngă hrŏm, grup bơwih ƀong hrŏm, anom bơwih ƀong sĭ mơdrô hăng ƀing apăn bruă lĕ ƀing mơnuih mut hrŏm amăng ngă tui pơplih yua boh thâo phrâo amăng ngă hmua. Man pơdong anih anom, plang pơhing mơnuih mơnam hăng anih djă pioh hră pơ-ar. Bruă gum hrŏm hăng djru hrŏm mơng anih anom kơđi čar, mơng djop gưl Ping gah, gong gai, hơdôm anom bơwih ƀong sĭ mơdrô amăng ngă đang hmua”.

Truh ră anai tơring čar Kon Tum hơmâo 48/86 boh să đĭ plơi pla phrâo, amăng anun hơmâo 7 boh să plơi pla phrâo tui gưl glông hăng 2 boh să plơi pla phrâo tui kru hle. Hrŏm hăng anun tơring čar ăt hơmâo 21 boh plơi pla dưi ngă djơ̆ hơnong pơkă tui kru hle, 65/498 boh plơi pla djuai ania ƀiă dưi đĭ plơi pla phrâo. Anai lĕ sa amăng hơdôm atur phun kiăng tơring čar ngă tui hơdôm hơdră bruă phrâo, pơčeh phrâo hăng lăp djơ̆ kiăng pơtrut pơplih yua boh thâo phrâo amăng ngă hmua hăng pơđĭ kyar ƀon lan rơgơi./.