Tal bơyan pơdơi prong thun anai, na nao mơ̆ng mơguah hrơi sa truh hrơi 5 amăng rơwang hrơi tơjuh, 40 čô čơđai tơnap tap ƀơi plơi Trol Đeng, tơring kual Čư̆ Ty, tơring glông Đức Cơ glăk hur har nao hrăm ƀơi anih hrăm jăng jai pơ̆ Sang hră plơi. Khă ƀing čơđai anet 6 thun ƀudah ƀing adơi amai prong 10 thun, ăt leng kơ hur har pran jua hăng hơdrôm hră, gai čih hăng hơdôm mông hrăm plah nao rai hăng hơdôm mông ngui ngor. Adơi Rmah H’ Xiêu, 7 thun, ƀơi plơi Trol Đeng, tơring kual Čư̆ Ty, tơring glông Đức Cơ, lăi pơthâo.

“Kâo hrăm anih 2, nao hrăm dưi ngui ngor, nai pơtô kâo pơđok, kâo nao hrăm bơyan pơdơi prong mơ-ak biă”.

Bơ̆ adơi H’ Nhi Êban, 10 thun ƀuh phĭng kơ pran jua hloh lơm dưi gum hrŏm anih hrăm.

“Thun anai kâo đĭ anih 5, nao hrăm ƀuh ñu mơ-ak biă, dưi hmư̆ nai pơtô pơblang, kâo hor nao hrăm bơyan pơdơi prong tui anai biă”.

Nai Nông Ngọc Huân, (nai pơtô ƀơi Sang hră gưl 3 Lê Hoàn, tơring glông Đức Cơ) lĕ sa amăng hơdôm čô nai gơgrong pran pô pơtô djru gum kơ čơđai plơi Trol Đeng. Ƀơi anai, nai pơtô brơi kơ čơđai hơdôm tơlơi ngui anet ƀơi anai mơ̆ng bôh hră čih, pơhrăm pơđok bôh hră truh ngă toán amuñ. Nai Nông Ngọc Huân lăi pơthâo, ñu ƀuh mơ-ak biă lơm ƀing čơđai anet ƀơi kual tơnap tap pơplih phrâo tui rim mông hrăm.

“Ƀing čơđai mut anih sa ƀing nai đing nao pơtô hrơi ƀing čơđai pơđok hăng čih, hrŏm hăng anun prăp brơi dong kơ ƀing čơđai sa dua bôh thâo amăng tơlơi hơdip mơda. Ƀing čơđai prong hloh lĕ thâo pơđok hloh, samơ̆ kiăng ƀing čơđai mut hrŏm hăng khin hơtai lĕ ƀing nai amra hmâo hơdôm tơlơi pơhrăm phara, hmâo hơdôm bruă mă kiăng ƀing čơđai dưi pơhrăm dŏng bôh thâo amăng tơlơi hơdip mơda. Ƀuh ƀing čơđai pơplih phrâo hloh lu biă, mơ-ak hloh, gum hrŏm hơdôm bruă mă klă biă”.

Tui hăng nai Lê Thị Xuân, mơnuih amăng Khul hlăk tơring kual Čư̆ Ty, tơring glông Đức Cơ, khă kơƀah tơnap, khom hrăm ƀơi anih hơjan angin samơ̆ ƀing čơđai ăt gir run nao hrăm mơn. Anih hrăm bơyan pơdơi prong ƀu apah prăk ƀơi plơi Trol Đeng ƀu kơnong kơ ba truh bôh thâo, hơdră phrâo kơ ƀing čơđai sang hră ôh mơ̆ dô̆ djru ƀing hlăk ai hmâo dong tơlơi găn rơgao, dưi bơwih brơi kơ plơi pla hăng ƀu pơdơi kơjăp pran jua.

“Lơm pơtô brơi ƀơi anai kâo ƀuh ƀing čơđai hur har pran jua biă, khă adai hơjan, angin ƀing čơđai anun ăt nao hrăm tum mơn, nao hrăm djơ̆ anô̆ ñu khom djă ba adơi nao hrŏm. Ƀing čơđai kơƀah lu mơta biă, samơ̆ ƀuh pran jua hrăm hră mơ̆ng ƀing čơđai klă biă. Kâo čang rơmang jơlan hơdră anai amra djă pioh dong amăng hơdôm tal bơyan pơdơi prong thun dơi”.

Amai Lê Thị Thu, Khua git gai Khul hlăk ai tơring kual Čư̆ Ty brơi thâo, anih hrăm bơyan pơdơi prong pơphun ƀơi plơi Trol Đeng jing anih hrăm lông lăng mơ̆ng ƀing hlăk ai tơring kual amăng bơyan pơdơi prong anai. Anom amra gir run djă pioh dong jơlan hơdră anai amăng hơdôm thun tơdơi anai pioh djru ƀing čơđai kual tơnap tap hmâo tơhnal dưi hrăm hră, ngui ngor hăng pơđĭ kyar abih bang.

“Hơdôm mơnuih amăng khul hmâo lu tơlơi gir run pioh pơsur ƀing čơđai nao hrăm prăp kơ ƀing čơđai bôh thâo, hơdôm bôh thâo kiăng hloh amăng tơlơi hơdip. Khul hlăk ai ăt pơsur mơn ƀing thâo tơngia pioh kơ ƀing čơđai lơm truh mông pơdơi tơbiă ngui rim gơñu amra hmâo sa hô̆p ia tơsâu rơmô, djru hơdrôm hră, sum ao hơđăp hăng hơdôm gơnam mă yua pơjing bruă hrăm hră hăng ngui ngor klă hiam kơ ƀing čơđai”.

Thun hrăm phrâo giăm či truh laih, sa dua anih anom brơi čơđai nao hrăm hlâo 2 rơwang hrơi tơjuh pioh juăt hăng sang hră, kiăo tui anih hrăm. Dô̆ glăi lu ñu hơdôm bôh sang hră amra brơi čơđai sang hră hơdôm gưl pơƀut pơphun mut hrăm akô̆ rơwang hrơi tơjuh pơ̆ anăp.

Sa bơyan pơdơi prong hăng hơdôm anih hrăm ƀu kơdrưh samơ̆ bă kơ pran jua kiăng khăp, ƀing čơđai muai kual tơnap kah hăng dưi tŭ mă dong pran jua hăng pran đăo kơnang pioh hrưn đĭ. Hăng ƀing gơyut hlăk ai gum djru, khă hơdôm mông pơtô anet samơ̆ hmâo ba truh laih lu tơlơi găn rơgao hăng kơjăp pran jua hloh lơm thâo hluh dơlăm hloh kơ tơlơi hơdip neh wa kual asuek ataih./.