Anai lĕ sa amăng hơdôm anom bơwih ƀong hrŏm ba jơlan hlâo amăng bơwih brơi tuai čuă ngui, ngă hmua-đang glai ƀôn lan, anom bơwih ƀong hrŏm gah ngă hmua hăng tuai čuă ngui Phú Nông-Buôn Đôn, tơring glông Buôn Đôn, tơring čar Dak Lak hơmâo gir run pơlir hơbit abih bang ding kơna pơjing sa khul pơđĭ kyar bơwih brơi tuai čuă ngui amăng plơi pla mơtăm. Hăng tơlơi dưi, tơlơi gal mơng kual đang glai hiam anun lĕ Đang glai dêh čar Yok Đôn, ia krông Sêrêpôk, hăng lu arăng ia krông čroh hnoh, dơnao pơkŏng ia, gru grua, añăm ƀong mơnuih djuai ania ƀiă…anom bơwih ƀong hrŏm hơmâo tŭ mă tơlơi dưi anai kiăng pơđĭ bơwih brơi tuai čuă ngui. Truh ră anai, lu hơbô̆ bruă mơng ding kơna anom bơwih ƀong hrŏm hơmâo lu mơnuih thâo. Samơ̆, kiăng pơjing hơdôm gơnam bơwih brơi tuai čuă ngui tui jơlan hơdră OCOP, anom bơwih ƀong hrŏm gah ngă hmua hăng tuai čuă ngui Phú Nông-Buôn Đôn, dŏ bưp lu tơnap tap, amăng anun hơmâo hơdôm bruă dưm dăp. Ơi Trần Văn Toàn, Khua khul git gai anom bơwih ƀong hrŏm brơi thâo:

“Tơlơi tơnap tap hloh ră anai lĕ tơlơi gun mơng bruă tuh pơ alin hăng pơđĭ kyar, yua kaih dưm dăp hơdôm kual pơđĭ kyar bơwih brơi tuai čuă ngui. Pơhmutu pơplih ha bơnah lŏn ngă hmua jing lŏn bơwih bơwang sĭ mơdrô ƀudah lĕ črâo ba kiăng mă yua lŏn ngă hmua tui tơlơi kiăng, yua dŏ tơguăn sui đơi anun kaih amăng bruă tuh pơ alin hăng pơđĭ kyar hơbô̆ bruă bơwih brơi tuai čuă ngui amăng ƀon lan”.

Tui tơlơi pơtrun mrô 148/QĐ-TTg thun 2023 mơng Khua dêh čar, hơnong pơkă sem lăng hơdôm gơnam OCOP bơwih brơi tuai čuă ngui hơmâo pơkă tong ten, rơđah rơđông, samơ̆ ăt ƀu amuñ kiăng pơjing. Tui kơ-iăng nai tha prin, nai prin tha Trần Văn Ơn, khua črâo ba jơlan hơdră OCOP dêh čar, tơlơi tơnap tap hloh lĕ yua gơnam tam pơlir djop gơnong bruă. Yua anun, mah Dak Lak dŏ lu tơlơi gal kiăng pơđĭ kyar samơ̆ amra tơnap kiăng kơ truh kih tơdơi ƀu hơmâo tơlơi gum hrŏm ha amăng plĕ hăng tong ten mơng hơdôm anom bruă bơdjơ̆ nao.

“Jơlan hơdră rĭm boh să sa gơnam yua gơnong bruă ngă hmua hăng pơđĭ kyar ƀon lan glăm ba, samơ̆ gơnam tam ƀu djơ̆ kơnong mơng gơnong bruă ngă hmua hăng pơđĭ kyar ƀon lan đôč ôh mơ̆ hơmâo wŏt gơnam bơwih brơi tuai čuă ngui. Yua anun tơdah kiăng ngă mă hơjăn amra tơnap tap biă mă. Rĭm thun gơnong bruă bơwih brơi tuai čuă ngui ăt hơmâo ngă lu mơn. Tơdah ngă hrŏm klă, gơnam bơwih brơi tuai čuă ngui ƀơi anai amra pơđĭ kyar. Yua tui tơlơi sit nik hơmâo lu gơnam bơwih brơi tuai čuă ngui mơng tơring čar Dak Lak, samơ̆ yua ƀing ta amra sem lăng tong ten anun aka ƀu hơmâo tơlơi ngă hrŏm. Tơdah hơmâo tơlơi ngă hrŏm amra pơđĭ kyar mơtăm”.

Ơi Nguyễn Hoài Dương, Khua gơnong bruă ngă hmua hăng pơđĭ kyar ƀon lan tơring čar Dak Lak brơi thâo, đơ đam tơring čar hơmâo giăm 17 boh plơi pla dưi tŭ mă hơdôm tơlơi dưi yôm phara pơlir hăng pơđĭ kyar bơwih brơi tuai čuă ngui OCOP. Samơ̆, tơring čar aka ƀu pơjing gơnam OCOP tuai čuă ngui, yua anun hơbô̆ bruă bơwih brơi tuai čuă ngui anai ăt ngă mă hơjăn, raih daih, lu hloh tŭ mă hơdôm gơnam glăk hơmâo, aka ƀu pơdah anŏ yôm phara kơ gru grua hăng rơnoh yôm mơng gơnam tam. Dak Lak glăk gir run ngă tui hơdôm hơdră bruă kiăng djru pơđĭ kyar gơnam OCOP tuai čuă ngui djơ̆ hăng tơlơi dưi, tơlơi gal mơng ƀon lan.

“Hơdôm anom bruă bơdjơ̆ nao kiăng hơmâo lu jơlan hơdră črâo ba kiăng hơdôm anom bơwih ƀong sĭ mơdrô, anom bơwih ƀong hrŏm hăng neh met wa amăng plơi pla, sit biă ñu lĕ ƀơi hơdôm kual hơmâo anŏ gal bơwih brơi tuai čuă ngui ƀuh tong ten tơlơi dưi hăng pơjing hơdôm gơnam tuai čuă ngui lĕ gơnam OCOP kiăng ba glăi tŭ yua ƀiă dong tui tơlơi gal anai”.

Bruă Dak Lak pơđĭ kyar bơwih brơi tuai čuă ngui pơlir hăng jơlan hơdră OCOP amra pơgôp hrưn đĭ rơnoh yôm mơng gơnam tuai čuă ngui, ba glăi tơlơi dưi amăng bơwih ƀong huă, đĭ tui prăk pơhrui mơng mơnuih ƀôn sang. Mơng anun, djru brơi mơnuih ƀôn  sang rơđah ƀiă dong amăng djă pioh, tŏ tui gru grua djuai ania pô./.