Sang anŏ yă H’Săk plơi Bơnŭ, să Čư̆ Ă, plơi prong Plei Ku hơmâo 7 čô mơnuih dŏ hrŏm amăng sa boh sang anet aneo, man pơdong sui sĭn laih. Rơkơi ñu rơngiă yua kơ duăm ruă, hơjăn păn ñu yơh rông ba wơ̆t adơi mơ̆ng rơkơi ñu, mơnuih rơwen rơwo mơ̆ng anet anun tơlơi hơdip mơda, bơwih ƀong huă sang anŏ tơnap tap biă mă, prăk pơhrui glăi kơnong hyu mă bruă apah. Kiăng djru kơ yă H’Săk hrưn đĭ, “Kơčăo bruă pơsir lu hơdră bơwih ƀong huă, pơđĭ kyar bruă mă pơhrŏ ƀun rin” hơmâo djru 1 drơi rơmô ania tuh ană. Yă H’Săk hok mơak biă mă yua tơdơi kơ 2 thun rông rơmô hơmâo ba glăi boh tŭ yua:

“Bơni kơ kơnuk kơna hơmâo djru sang anŏ tơnap tap ƀun rin kah hăng gơmơi anai, yua hơmâo tơlơi djru anai yơh gơmơi hơmâo anŏ gêh găl hrưn đĭ amăng tơlơi hơdip mơda, kâo bơni lu biă mă”.

Tui hăng yă Nguyễn Thị Thu Hương, Kơ-iăng Khua Jơnum min mơnuih ƀôn sang să Čư̆ Ă, rơngiao kơ pơđĭ kyar bruă čem rông, mă mơ̆ng anŏ djru pơjeh ană rơmô yua kơnuk kơna brơi, bruă pơhrŏ ƀun rin ƀơi să dŏ hơmâo lu boh tơhnal tŭ yua klă amăng bruă čan prăk hăng kơmlai ƀiă, pơblih bruă mă. 3 thun laih rơgao, să hơmâo djru 42 drơi rơmô kơ sang anŏ ƀun rin, djru prăk brơi pơblih hĭ bruă mă kơ 10 boh sng anŏ hăng brơi 8 sang anŏ čan prăk kơmlai ƀiă….Yă Nguyễn Thị Thu Hương brơi thâo:

“Rim thun să đing nao lu hơdră djru, kơčăo bruă pơsir lu mơta bơwih ƀong huă yua khua mua plơi prong Plei Ku hăng să djru hơdôm sang anŏ ƀun rin, giăm ƀun rin kah hăng djru bruă ia jrao, pơtô hrăm, pơdong sang dŏ, čan prăk gơgrong anăn, pơsir bruă mă pơtô brơi bruă mă hơmâo boh tŭ yua mơ̆n, mơ̆ng anun ƀuh tơlơi hơdip mơda mơnuih ƀôn sang pơblih lu, đĭ đăi gŏ amŏ, hơmâo tŭ mă tơlơi djru bruă mơnuih mơnam, hơdră djru anun truh pơ djop sang anŏ ƀun rin hăng giăm ƀun rin”.

Ƀuh rơđah, rim sang anŏ ƀun rin ƀơi plơi prong Plei Ku, tơring čar Gia Lai hơmâo tơlơi tơnap tap, anŏ kiăng djru phara soh. Kah hăng yă Trần Thị Phượng, 50 thun, dŏ ƀơi plơi Thôn 4, să Trà Đa, plơi prong Plei Ku, tơdơi kơ abih prăk kăk yua pơjrao tơlơi duăm ruă kơ mơnuih amăng sang anŏ ruă bơbrah brŭ asar, jai kiăng hơmâo tơlơi djru hrŏm. Ƀuh rơđah tui anun, gong gai kơnuk kơna să, khul đah kơmơi mut phung, ƀing mơnuih pơdrong čơmah…djru hrŏm, kah pơpha brơi kơ ñu amăng mông tơnap tap hloh. Yă Phượng čăng glăi hơdôm rơnoh prăk djru anun yôm tloh noh, mơ̆ng anung asơi ha jam añăm ha čơlŭ arăng ba nao tơl sang gơñu:

“Hlăk mông tơnap tap hloh, gong gai kơnuk kơna să djru kơ sang anŏ gơmơi hơmâo hĭ sang dŏ klă, djop anom bruă kơnuk kơna ƀing ană bă kâo hơmâo asơi huă añăm ƀong rim hrơi hlăk hrơi mông tơnap tap anun. Ră anai, ană bă kâo hrăm hră, sang anŏ dưi dăi ƀiă hơmâo anăn pơklaih mơ̆ng ƀun rin. Tal hrơi blan rơkơi kâo duăm kraih să Trà Đa hăng Khul đah kơmơi mut phung djru kâo 5 klăk prăk apah arăng pĕ kơphê, yua kâo dŏ pơ sang ia jrao ƀu hơmâo pô pĕ kơphê, sa čơpăt hai lơ̆m kian rơpa, sa anung lơ̆m mông kian trơi, kâo dlưh pran jua biă mă”.

Ngă tui Hơdră mrô 31-CTr/TU lơ 31/11/2021 mơ̆ng Khul apăn bruă ping gah plơi prong Plei Ku tal XII “Kơ bruă pơtrut pơhrŏ ƀun rin hơđong kjăp, pơđĭ tui anŏ tŭ yua klă kơ tơlơi hơdip mơda mơnuih ƀôn sang, boh nik ñu ƀơi djop plơi pla mơnuih ƀôn sang djuai ƀiă amăng plơi prong”, mơ̆ng thun 2021 truh ră anai, plơi prong hơmâo ngă hrŏm lu sang bruă, jơnum min djop să jak iâu sang bruă bơwih ƀong sĭ mơdrô, mơnuih pơdrong djru hrŏm, keh prăk “Yua kơ mơnuih ƀun rin plơi prong” hăng mơ̆ng să djru 95 boh sang anŏ man pơdong phrâo hăng pơkra glăi sang dŏ abih tih rơnoh prăk lĕ 4 klai 700 klăk; djru phun pla, pơjeh djuai hlô mơnong rông, hơbâo pruai, kmơ̆k jing, prăk čan truh 1 klai 200 klăk prăk; djru 252 boh sang anŏ ƀun rin, giăm ƀun rin, phrâo pơklaih mơ̆ng ƀun rin dưi čan prăk djru kơmlai hăng rơnoh truh 13 klai 800 klăk prăk....Ơi Trần Tấn Quang, Khua anom wai lăng bơwih ƀong huă plơi prong Plei Ku, brơi thâo, mrô sang anŏ ƀun rin amăng plơi prong hơmâo truh 0,24%, abih bang dŏ 149 boh sang anŏ. Plơi prong hlăk kơsem min, ĕp hơdră pok pơhai lu bruă pơsir tơlơi bơwih ƀong huă djơ̆ găl kiăng pơđĭ tui boh tŭ yua amăng bruă anai:

"Hăng tơlơi gơgrong ba jing anom bruă pô pok pơhai ngă tui tơlơi git gai mơ̆ng plơi prong pioh djru lu hơdră pơsir brơi tơlơi bơwih ƀong huă kơ mơnuih ƀôn sang ƀun rin, anom bruă hơmâo ngă pơrơđah tui djŏ tơlơi pơtrun, jơlan hơdră, hơbô̆ bruă, djru ba gơnam yua djơ̆ găl pioh bơwih brơi tơlơi hơdip mơda mơnuih ƀôn sang, kiăng pơklaih mơ̆ng ƀun rin hăng pơklaih ƀun rin hơđong kjăp. Anom bruă wai lăng tơlơi bơwih ƀong huă plơi prong ăt hrŏm hăng djop jơnum min mơnuih ƀôn sang djop să, phường laih anun anom bruă bơwih brơi bruă ngă hmua kơsem min, pok pơhai hơbô̆ bruă djru pơsir brơi hơdră bơwih ƀong huă kơ mơnuih ƀôn sang laih anun djru mơnuih ngă hmua, kiăng pơđĭ tui boh tŭ yua kơ tơlơi hơdip mơda rim hrơi, pơhrŏ ƀun rin hơđong kjăp amăng plơi prong kơñ pơgi ni anăp”.

Bruă mă pơhrŏ ƀun rin dưi hơmâo khua mua plơi prong Plei Ku tơring čar Gia Lai ngă tui na nao hăng lu thun laih rơgao. Amăng thun blan pơđĭ kyar bruă ngă anai, pơphô rơđah bruă kiăng đing nao kơ mơnuih ƀôn sang amăng kual plơi pla,  sang dŏ hăng hnơ̆ng hơdip mơda. Mơ̆ng anun, pơtrut ngă tui anŏ gêh găl, pran kơtang pơtrut pơđĭ kyar mơ̆ng plơi prong, pơđĭ kyar ƀôn lan, jơlan glông plơi prong, tơlơi bơwih ƀong huă mơnuih mơnam pơđĭ hơđong kjăp, pơgang tong ten ayuh hyiăng anih dŏ jum dar hiam klă rơgoh hơdjă.