Đuăi ƀơi jơlan ƀê tông bă kơ bơnga pla tơpă glông, ƀơi kơtuai dua bơnah jơlan, yă Kpuih Hạnh – Khua git gai Grŭp Ping gah ngă rah Khua plơi Neh Xo, să Ia Tôr, tơring glông Čư̆ Prông brơi thâo, jơlan bơnga anai dưi hmâo hơdôm bôh sang anô̆ mơnuih ƀôn sang amăng plơi pla giong mơ̆ng krah thun hlâo hăng jing sa črăn bruă mơ̆ng jơlan hơdră pơdŏng plơi pla phrâo ƀơi anai. Hrŏm hăng ƀô̆ mơta plơi pla thâo rơguăt, agaih hiam, lơm truh akô̆ pơdŏng plơi pla phrâo, tơlơi hơdip mơda neh wa plơi Neh Xo ăt dưi pơđĭ tui rơđah mơn, kơnong kơ dô̆ 6 bôh sang anô̆ (amăng mrô 150 bôh sang anô̆) dô̆ gah ƀun rin. Tui hăng yă Kpuih Hạnh, hăng sa bôh plơi kah hăng abih bang neh wa djuai ania ƀiă kah hăng Neh Xo, kiăng neh wa gum hrŏm, ha jua thơ, bruă ngă gru hlâo mơ̆ng mơnuih apăn bruă, mơnuih ping gah lĕ yôm phăn biă:

 “Ping gah nao hlâo, plơi pla kiăo tui tlôn. Blung hlâo mơnuih ping gah khom ngă tui hlâo hơdôm bruă kah hăng jơlan bơnga, war mơtah, klơi amăng luh djah, pơkra sang juă glai lăp djơ̆, ngă tui klă hơdôm hơdră pơtrun, jơlan gah, hơdră bruă, tơlơi phiăn mơ̆ng kơnuk kơna; lăi pơhing hyu neh wa bơwih ƀong huă rơgơi, đĭ dong prăk pơhrui glăi, pơplih tơlơi pơmin hơdră ngă; ƀu pioh pơdô̆ rơkơi bơnai mơ̆ng muai, brơi ană bă nao hrăm hră truh kih”.

Tui hăng anun, ƀơi plơi Bang, ia Ia Tôr, 11 čô mơnuih ping gah amăng grŭp ping gah pơsur sang anô̆, mơnuih amăng gŏp djuai pơčruh prăk, hrơi bruă pơkra jơlan hăng ngă tui hơdôm tơhnal pơkă kơ rơhuông adai lŏn mơnai, bruă ia jrao, pơtô pơhrăm. Grŭp ping gah plơi hrŏm hăng gong gai să, jơnum min djop djuai ania khul grŭp ƀơi să Ia Tôr pơsur neh wa gum hrŏm klă pla glăi kơphê, ƀu koh lui phun pla sui thun, hrăm tui tơdruă pruih ia pơkrem hăng mă yua măi mok ngă đang hmua. Mơ̆ng krah thun 2023, lu djuai phun pla djơ̆ bơyan, hmâo nua, djru laih hơdôm bôh sang anô̆ amăng plơi hmâo anô̆ ƀong, anô̆ huă, anô̆ pioh lui. Ơi Puih Pak - mơnuih ƀôn sang amăng plơi Bang brơi thâo:

 “Đưm hlâo adih tơnap tap hloh, ră anai plai ƀiă laih. Sa dua bôh sang anô̆ bơwih ƀong rơgơi lĕ hmâo sang, hmâo rơdêh abih laih, ƀu hmâo sang hlang kah hăng đưm hlâo dong tah. Ră anai tơlơi hơdip mơda pơđĭ kyar hloh kơ hlâo laih”.

Ră anai, să Ia Tôr, tơring glông Čư̆ Prông hmâo rơbêh kơ 1.100 bôh sang anô̆ mơnuih ƀôn sang, hăng 5.079 čô mơnuih. Amăng anun neh wa djuai ania ƀiă hmâo giăm truh 50%. Amăng lu thun pơdŏng plơi pla phrâo, Ping gah să hmâo git gai, črâo ba, črâo bruă kơđi čar mơ̆ng să truh hơdôm bôh plơi pla, ala ƀôn, pơplih phrâo jơlan gah mă bruă; đing nao lăi pơhing hyu, pơsur mơnuih ƀôn sang gum hrŏm klă, ƀơƀrư̆ ngă giong hơdôm tơhnal ba tơbiă.

Rơnuč thun 2023, să hmâo 19/19 tơhnal pơkă pơdŏng plơi pla phrâo. Djop mơta tơlơi hơdip mơda Mơnuih ƀôn sang hmâo pơplih klă laih. Ră anai, mrô sang anô̆ ƀun rin hăng ƀun rin ƀơƀiă đơ đam să hrŏ trun dô̆ yŭ kơ 8%; pơhrui glăi hơnong ƀu sa akô̆ mơnuih hmâo 47 klăk prăk sa thun; Bruă pơtô pơhrăm, bruă ia jrao, bơwih brơi tơlơi suaih pral, pơgang anih anom dô̆, hơdor tơngiă, pơdŏng pơjing tơlơi hơdip tâ̆o yâo ƀơi kual mơnuih ƀôn sang dô̆ dưi đing nao; Tơlơi rơnuk rơnua bruă kơđi čar, hơđong pơhlôm abih bang mơnuih mơnam dưi djă pioh kơjăp.

Ơi Nguyễn Quang Phương – Kơ-iăng Khua git gai Ping gah să Ia Tôr brơi thâo, Ping gah să amra git gai dong bruă kơđi čar mơ̆ng să truh pơ̆ plơi pla, ala ƀôn pioh djă kơjăp hăng pơđĭ tui hơdôm tơhnal pơkă plơi pla phrâo. Amăng anun, amra lăng yôm bruă gơgrong ngă gru hlâo mơ̆ng mơnuih ping gah pioh gum hrŏm Mơnuih ƀôn sang pơđĭ tui prăk pơhrui glăi:

 “Grŭp apăn bruă Ping gah să hmâo pơjing laih kơčăo bruă lăi pơhing hyu hrăm tui hơdôm tơlơi pơtrun pơsit tơlơi črâo ba truh mơnuih ping gah, mơnuih apăn bruă hăng mơnuih ƀôn sang ƀơi să. Rơgao kơ bruă hrăm ngă tui tơlơi pơmin pran jua, kơnuih Hồ Chí Minh lĕ mơnuih ping gah giăm mơnuih ƀôn sang hloh, lăng tui mơnuih ƀôn sang hloh, hmư̆ tơlơi gum pơhiăp, tơlơi pơmin, tơlơi čang rơmang mơ̆ng Mơnuih ƀôn sang, lăi nao kơ ping gah, gong gai, să”.

Hăng tơlơi gum hrŏm amăng ngă tui hơdôm tơlơi pơtrun, jơlan hơdră, kơčăo bruă, ping gah, gong gai hăng Mơnuih ƀôn sang glăk gum hrŏm pơdŏng tơlơi hơdip mơda jai hrơi jai pơplih phrâo ƀơi guai tơring čar Gia Lai./.