Amăng kual lŏn krô krañ mơ̆ng sa Ea Ñuôl, tơring glông Buôn Đôn, tơring čar Dak Lăk hơmâo đang boh ƀrô yuan rơbêh 1,5 hecta, glăk hơmâo ơi Lý Mạnh Hùng wai lăng, čơkăp than hiam prăp lui kơ bơyan phrâo. Ơi Hùng brơi thâo, amăng bơyan boh ƀrô, lơ̆m nao pơ đang, ƀing tuai dưi ƀong hơdơ̆ či ƀong yơh, sem lăng bruă pla, wai lăng phun pla, pĕ boh ƀrô, pô sang hok mơ-ak biă yua dưi sĭ gơnam ƀơi anih hlao, huăi rơngiă prăk apah mơnuih pĕ, huăi rơngiă prăk pơgiăng hyu sĭ. Ơi Lý Mạnh Hùng lăi: “Mơ̆ng hrơi pla boh ƀrô anai, ƀrô bơwih brơi ƀing tuai hyu ngui, ƀrô djru brơi sang anŏ hơmâo prăk kơ sang anŏ, kâo lăng ƀơi lŏn krô krañ mơ̆ng Buôn Đôn anai lăp djơ̆ biă hăng phun ƀrô. Phun ƀrô hơmâo ba pla pơ kual Dap Kơdư amuñ pla, amuñ rông, ta dưi brơi ñu bơnga tui hăng ta kiăng. Boh ƀrô dưi sĭ hlao pơ ƀing tuai rai ngui, jing sang anŏ gơmơi hơmâo hmăi prăk mơn”.

Ƀu kơnong pla djuai phun hơmâo mơ̆ng đưm đôč ôh, mơnuih ngă hmua ƀơi tơring glông Buôn Đôn pơplih phrâo, pla lăng djuai phrâo. hơdôm hơbô̆ bruă pla glăi prăk lu, hơmâo tuai hor nao lăng. Hmư̆ hing kar hăng đang boh tơƀâu mơboh tlep ƀơi phun, rơdêh 1.800 phun mơ̆ng ơi Đỗ Trọng Huế, să Ea Huar, tơring glông Buôn Đôn. Ơi Đỗ Trọng Huế brơi thâo, mah kơnong hơmâo 100 phun đôč glăk mơboh, samơ̆ sang anŏ ñu pơhrui mơ̆ng phun tơƀâu năng ai 200 klăk prăk/thun. Ƀu kơnong tui anun đôč ôh, hơmâo lu mơnuih tơña kiăng nao čuă lăng ƀơi anăp, hyu sem lăng đang boh tơƀâu...

“Mơ̆ng hrơi sang anŏ pla hăng sem lăng phun tơƀâu anai klă, hơmâo ba sĭ amăng hơdôm thun giăm anai. Sang anŏ gơmơi pơƀuh đĭ amăng plang internet, hơmâo lu mơnuih rai pơ anai, kiăng sem lăng...Yua hnun, sang anŏ gơmơi pơmin bơwih ƀong bơwih brơi tuai čuă ngui hyu lăng, anun jing glăk ngă hră rơkâo”.

Mơ̆ng tơlơi gêh gal anai, lăng ƀuh tơlơi kiăng mơ̆ng ƀing tuai jai hrơi lu. Ơi Trần Văn Toàn, Khua anom ngă ƀong hrŏm Tuai čuă lăng đang hmua Phú Nông - Buôn Đôn brơi thâo, Anom ngă ƀong hrŏm pơtruh hăng hơdôm boh sang anŏ pơƀut rông hlô, tơjŭ pla hơdôm djuai phun pla hmư̆ hing mơ̆ng tơring kah hăng: rông pai, mơnŭ, akan, boh kruăi mih, boh hyiăng, ca cao, boh ƀrô...bơwih brơi kơ ƀing tuai nao lăng.

“Ta khŏm prăp rơmet hlâo, kiăo tui tơlơi pơplih mơn, tơdah ta kơnong gơñăm kơ bruă tuai čuă ngui, lui hĭ bruă ngă hmua lĕ ƀing tuai ƀu thâo lăng hơget lơi. Ră anai, ƀing tuai glăk ƀơ ƀrư̆ hyu ngui kiăng kơ pel ĕp, ngă lăng, hyu hơduah ĕp lăng djŏp bruă ta ngă”.

Ơi Y Si Thăt Ksơr, Kơ-iăng khua Jơnum min mơnuih ƀôn sang tơring glông Buôn Đôn brơi thâo: Tơring glông lăp đing nao biă bruă pơđĭ kyar tuai hyu ngui čuă lăng đang hmua, plơi pla. Amăng Tơlơi pơtrun Ping gah tơring glông thun 2020-2025 hơmâo lăi nao kơ tơlơi anai. Hrơi blan rơgao, Jơnum min mơnuih ƀôn sang tơring glông jao kơ Anom bruă hmua hăng pơđĭ kyar ƀôn lan ngă hrŏm hăng Anom bruă gru grua - pôr pơhing kiăo tui jơlan đĭ kyar, tơlơi gêh gal mơ̆ng tơring glông ruah mă hơbô̆ bruă lăp djơ̆ či ngă. Hrŏm hăng anun, tơring glông Buôn Đôn ăt lăp đing nao đĭ kyar anom ngă ƀong hrŏm. Truh ră anai, tơring glông hơmâo 19 anom ngă ƀong hrŏm glăk mă bruă, amăng anun hơmâo lu anom ngă ƀong hrŏm ngă bruă bơwih brơi tuai čuă ngui - ngă hmua. Ơi Y Si Thắt Ksơr brơi thâo dong:“Pơ anăp anai gơmơi kiăo tui Tơlơi pơtrun mrô 88 mơ̆ng Khua mua pơ ala mơnuih ƀôn sang či djru ba hơdôm boh sang anŏ dưi đĭ kyar. Laih dong, ngă hrŏm hăng anom ngă ƀong hrŏm, biă ñu kual mơnuih ƀôn sang djuai ƀiă đah mơ̆ng pơplih tui tơlơi pơmin, hơdră ngă bruă pơđĭ kyar tuai čuă ngui nao hrŏm hăng ngă hmua, plơi pla...Laih dong djru brơi mơnuih ƀôn sang djuai ƀiă hơmâo bruă mă, djru pơplih phrâo, đĭ kyar lăp djơ̆ hăng kual plơi pla”.

Hăng hơdôm jơlan bơwih ƀong rơđah rơđông, tơring glông Buôn Đôn, tơring čar Dak Lăk glăk anăp nao pơkra lu gơnam bơwih brơi tuai čuă ngui, mă yua tơlơi gêh gal mơ̆ng hmua, ngă tŭ yua hơbô̆ bruă tuai čuă ngui pơlir hăng ngă hmua či pơhưč tuai amăng dêh čar wơ̆t hăng čar rơngiao, djru pơđĭ kyar bơwih ƀong amăng plơi pla ƀơi guai dêh čar./.