VOV4.Jarai - Čơtlăm lơ 28/3, Jơnum lăng nao rai amăng tivi đơ đam dêh čar ta kơsem min, hrăm tui, lăi pơthâo Tơlơi pơtrun pơsit Jơnum tal 13 mơng Ping gah hmâo pơđut truh kih klă hiam tơdơi kơ 2 hrơi mă bruă ba glăi bôh tơhnal. Pơhiăp amăng mông pơđut tal jơnum, Khua apăn bruă git gai Ping gah, Khua Grŭp pơtô bruă ping gah dêh čar ơi Nguyễn Trọng Nghĩa pơsit, jơnum tal anai hmâo lu tơlơi pơplih phrâo amăng bruă prăp lui, bruă akô̆ pơphun, mơnuih lăi pơthâo glăi bruă mă lĕ ƀing khua mua phun mơng Ping gah, Kơnuk kơna hmâo ƀơi anăp lăi pơthâo glăi Tơlơi pơtrun pơsit, djru pơđĭ tui anô̆ kơjăp bruă hrăm Tơlơi pơtrun pơsit. Khua apăn bruă git gai Ping gah, Khua Grŭp pơtô bruă ping gah dêh čar ơi Nguyễn Trọng Nghĩa brơi thâo, hăng rơbêh kơ 7 rơbâo 400 anih anom tô nao rai ƀơi anom bruă, hmâo giăm truh 1 klăk čô mơnuih ping gah amăng đơ đam dêh čar hmâo lăi pơthâo, hrăm tui Tơlơi pơtrun pơsit, anun lĕ lom mơng 5-6 čô mơnuih ping gah lĕ hmâo sa čô mơnuih gum hrom hrăm tui amăng tal anai hăng sa pran jua ječ biă./.

Siu H’ Prăk: Pô pơblang