VOV4.Jarai - Thun 2021, kiăng pôr pơhing kơ abih bang thâo hluh hloh kơ tơlơi dưi mơng ƀing čơđai, pơgang hăng lăng ba ƀing čơđai amăng hrơi hơmâo klin; laih dong djru ba ƀing čơđai bơbeč yua klin Covid-19, Blan ngă bruă yua kơ čơđai thun anai hơmâo pơƀut ngă bruă: “Gum tơngan ngă tơlơi dưi mơng ƀing čơđai, pơgang ba ƀing čơđai amăng tơlơi truh lŏn adai ngă, klin kheng”. Hăng akŏ bruă anai, ƀơi kual Dap Kơdư hrŏm hăng dêh čar ta hơmâo lu bruă ngă sit nik hăng ƀing čơđai.

Sa amăng hơdôm bruă ngă sit nik blung a ƀơi tơring čar Dăk Lăk lĕ Keh prăk pơgang ba ƀing čơđai amăng tơring čar anai hơmâo nao čuă, brơi gơnam hăng pơtô ba hơdră pơgang klin Covid-19 kơ ƀing čơđai ƀơi Anom pơgang ba mơnuih tơnap tap sang čua Bửu Thắng (plơi prong Buôn Ma Thuột). Ơi Lâm Đình Nhiên, Khua Keh prăk pơgang ba ƀing čơđai tơring Dăk Lăk brơi thâo, glăk gum man pơdong 4 boh sang dŏ; čuă jơmư, juh alum hơdôm boh sang anŏ hơmâo ană bă djai, sang anŏ hơmâo čơđai djai ia ƀlung ƀơi hơdôm boh tơring glông Čư̆ M’gar, Krông Pač, Čư̆ Kuin, hăng Krông Bông. Djru ba gơnam ƀong huă, gơnam yua hăng lăng ba tơlơi suaih pral, khăm hơtai boh hăng tơlơi ruă rơwen rơwô jô găng ƀơi ƀing čơđai.

“Keh prăk anai amra jak iâu hơdôm gong gai, khul grup, anom bơwih ƀong hăng anom bruă kơnuk kơna kiăng hơmâo prăk djru brơi ƀing čơđai hơmâo tơlơi ruă kơtang, kah hăng ruă hơtai boh mơng nge; čuă jơmư ƀing čơđai bưp tơlơi truh rơka rơkač, djai ƀlung ia. Laih dong, yôm hloh amăng hrơi anai hơmâo djru 30 klăk prăk kơ ƀing čơđai drit druai ƀơi Anom bruă pra yang sang čua Bửu Thắng pioh djru blơi gơnam ƀong huă, gơnam kiăng yua amăng hơdôm hrơi hơmâo klin hăng pơtô ba ƀing čơđai hơdră pơgang klin Covdi-19”.

Nao čuă hăng brơi gơnam kơ ƀing čơđai ƀơi sang čua Bửu Thắng, Dăk Lăk.

Ƀơi Gơnong dlông, Keh prăk pơgang ba ƀing čơđai Việt Nam hăng Ding jum Mơnuih mă bruă - Tơhan rơka hăng Mơnuih mơnam pơsit djru asơi huă kơ rơbêh 4 rơbâo čô čơđai lĕ F0 hăng F1 glăk dŏ pơčlah pơƀut pơgang klin Covid-19. Tui anun, ƀing čơđai glăk pơjrao, dŏ pơčlah yua klin amra hơmâo djru prăk ƀong huă rim hrơi lĕ 80.000 prăk lơ̆m ha čô, hơmâo djru truh abih thun anai hlao.

Klin Covid-19 glăk ngă sat kơ tơlơi hơdip, tơlơi suaih pral hăng tơlơi klă hiam mơng ƀing čơđai. Tui hăng tơlơi sem lăng, amăng mrô 30 boh tơring čar hơmâo mơnuih ƀă klin Covid-19, hơmâo 18 boh tơring čar hơmâo čơđai ƀă kman F0, hăng dŏ jê̆ mơnuih hơmâo kman F1. Amăng anun, Bắc Giang glăk hơmâo mrô čơđai glăk dŏ pơčlah pơƀut lu hloh hăng hơdôm rơbâo čô čơđai. Yă Nguyễn Thị Nga, Kơ-iăng khua Anom wai lăng čơđai, Ding jum Mơnuih mă bruă - Tơhan rơka hăng Mơnuih mơnam brơi thâo, anom bruă glăk jak iâu abih bang gum djru, mơng anom bruă, khul grup, mơnuih mơnam amăng dêh čar hăng mơng tač rơngiao dưi găn rơgao hrơi blan anai, djru ba ƀing čơđai hơmâo tơlơi hơdip hiam hloh amăng pơgi kơdi anai.

“Amăng hơdôm hrơi giăm anai, ƀing gơmơi đing nao biă mă bruă pơtŏng glăi abih bang ƀing čơđai ƀă klin Covid-19 ăt kah hăng ƀing čơđai nao dŏ pơčlah arăng iâu F1. Kiăng gong gai djru ba ƀing čơđai, lăng ba tơlơi ƀong huă, tơlơi ƀing čơđai kiăng, biă ñu juh alum pran jua, tơlơi hŭi bral ƀu kơnong hơmâo ƀơi amĭ ama ƀing čơđai đôč ôh sit ƀing čơđai ăt hnun mơn”.

Kiăng hơmâo hơdră pơhlôm rơnuk rơnua kơ ƀing čơđai amăng hrơi hơmâo klin.

Ră anai Keh prăk pơgang ba ƀing čơđai Việt Nam ăt hyu iâu pơthưr arăng gum djru ba gơnam juăt yua, gơnam gah ia jrao kah hăng: bơnal gôm ƀô̆, ia tơsâo rơmô, mì, sum ao...brơi kơ ƀing čơđai lĕ F0, F1, F2 ƀơi tơring čar Điện Biên. Laih dong, khŏm hyu iâu pơthưr djru ba tañ kơ ƀing čơđai ƀơi tơring čar hơmâo klin kơtang kah hăng Bắc Giang, Bắc Ninh.

Čơkă Blan ngă bruă yua kơ ƀing čơđai thun 2021, sa, dua ding jum, anom bruă hơmâo hră git gai bruă ngă amăng Blan ngă bruă yua kơ ƀing čơđai. Jơnum min wai lăng mrô mơnuih, sang anŏ hăng čơđai muai - Ding jum Ling tơhan, Ding jum gru grua bơkơjăp drơi jăn hăng tuai čuă ngui; Ding jum pôr pơhing ngă hrŏm hăng Khul wai lăng rơnuk rơnua tơlơi pơhing Việt Nam hăng sa dua ding jum anom bruă bơdjơ̆ nao tơlơi pơplông “Čơđai sang hră hăng Rơnuk rơnua tơlơi pơhing”; Khul hlăk ai mut phung Hồ Chí Minh hơmâo pơphun Jơlan hơdră pơphun bơyan pơdơi prong. Yă Nguyễn Thị Nga brơi thâo dong:

“Anom bruă wai lăng ƀing čơđai, Ding jum Mơnuih mă bruă- Tơhan rơka hăng Mơnuih mơnam ăt hơmâo tơlơi djru ba mơng anom bruă jar kmar ƀơi Việt Nam ăt kah hăng hơdôm khul grup djru mơnuih mơnam. Amăng blan ngă bruă yua kơ ƀing čơđai amra pơphun lu tơlơi jơnum, biă ñu jơnum lăng nao rai amăng tivi lăi pơthâo rơđah kơ tơlơi phiăn, hơdră djru ăt kah hăng tơlơi kiăng thâo pioh kơ sang anŏ, ƀing čơđai ăt kah hăng mơnuih tơpuôl kiăng ƀing ta gum hrŏm pơhlôm ngă tơlơi dưi mơng ƀing čơđai, biă ñu lĕ čơđai bơbeč sat yua klin Covid-19 ngă”.

Anom bruă wai lăng ƀing čơđai ăt hơmâo hră git gai Gơnong bruă Mơnuih mă bruă - Tơhan rơka hăng Mơnuih mơnam hơdôm boh tơring čar, ƀon prong pơtrut hyu pơtô pơblang, pôr pơhing kiăng abih bang hmư̆ kah hăng amăng plang internet, plang pôr pơthâo tơlơi rơgơi, hơdră pơgang djơ̆ ngă kơ ƀing čơđai; pơgang tơlơi truh rơbuh bơbeč, rơka kơkač; pơgang ba ƀing čơđai ƀơi anih mă yua internet, lăi pơthâo kơ Anih iâu telephôn pơgang ba ƀing čơđai (111) pơ sang anŏ, mơnuih ƀon sang hăng ƀing čơđai thâo. Hơdôm kual plơi pla kiăng pơgang klin Covid-19 klă hloh kơ ƀing čơđai hăng pơgang ba ƀing čơđai amăng bơyan klin kheng tui anai, amăng anun kiăng thâo rơđah mrô čơđai, čih anăn hăng tơlơi kiăng djru mơng ƀing čơđai ƀơi anih glăk pơčlah abih bang hăng hơdôm anom bruă brơi pơčlah pơƀut ha anih; mă yua prăk mơng Keh prăk pơgang ba ƀing čơđai tơring čar (tơdah hơmâo) ƀudah prăk mơng Keh prăk pơgang ba čơđai Việt Nam hăng lu tơlơi gum djru pơkŏn dong či djru ba gơnam ƀong ngă kơjăp pran, gơnam kiăng yua rim hrơi, ia jrao hăng gơnam yua gah ia jrao brơi kơ ƀing čơđai kiăng huăi hơmâo ôh čơđai hlơi thơ kiăng gơnam, bưp tơnap tap mơ̆ ƀu hơmâo djru tañ.

VOV: Čih- Siu H’Mai: Pơblang