VOV4.Jarai - Mơguah lơ 18/3, ƀơi tơring glông Tây Giang, tơring čar Quảng Nam, Gong phun pơtui jua pơhiăp dêh čar Việt Nam pơphun mă yua Anom bruă pôr pơhing amăng brô̆ FM kơdah mă hơjăn ƀơi kơčŏng čư̆ Quế, să Tr’hy, tơring glông Tây Giang, tơring čar Quảng Nam jing kơčăo bruă blung a Gong phun pơtui jua pơhiăp dêh čar Việt nam mă yua boh thâo phrâo hloh wai lăng anih pôr jua pơhiăp, anun lĕ boh thâo ia rơgơi pơtui jua pơhiăp hluai tui êkrang, krăp lăng hăng gư̆ tut mơng ataih. Bruă sit nik mă yua anih pôr jua pơhiăp FM ƀơi kơčŏng čư̆ Quế djru kơ Gong phun pơtui jua pơhiăp Việt Nam pơđĭ tui anŏ klă, pok prong anih pôr pơhing, plai ƀiă huač prăk wai lăng hăng mă yua măi mok hơmâo ƀơi anih pôr jua pơhiăp, ba Tơlơi pơhiăp mơng Ping gah hăng Kơnuk kơna mơng gưl ping gah, gong gai tơring čar Quảng Nam  truh pơ abih bang mơnuih ƀon sang djŏp djuai ania gah yŭ Quảng Nam hăng hơdôm boh tơring čar ieo gah.

Siu H’Mai: Pơblang