VOV4.Jarai-Mơguah lơ 27/5, Ding jum Pơtô hăng Pơjuâ̆t pơphun jơnum lăng nao rai amăng tivi hăng 63 boh tơring čar, ƀôn prong kơ bruă pơphun tal pơplông abih anih 12 thun 2021. Ding jum Pơtô hăng Pơjuâ̆t lăi pơtong tơlơi khom ngă khut khăt tal pơplông anai samơ̆ pơgang rơnuk rơnua hơđong jing bruă phun.

Tui hăng Ding jum Pơtô hăng Pơjuâ̆t, hăng ƀing čơđai sang hră anih 12, ră anai hơmâo 18 čô mơnuih đing lĕ F0, mơnuih hŭi ƀă kman laih, 394 čô F1, lu biă mă pơ tơring čar Bắc Giang, Bắc Ninh, Hà Nam hăng Điện Biên.

Samơ̆, yua thâo thăi laih mơ̆n pơphun pơplông hơdôm thun mơ̆ng hlâo, thun anai ăt khom pơphun pơplông đôč. Ding jum Pơtô hăng Pơjuâ̆t pơkra hơdră prăp lui hlâo bong hăng klin lu hơdră ngă phara. Ding jum Pơtô hăng Pơjuâ̆t ăt rơkâo djop tơring čar pơkra hơdră tum teč pioh pơphun tơlơi pơplông amăng mông khă hơmâo klin Covid 19 hai.

Nay Jek: Pơblang