VOV4.Jarai - Pơkra, pơsit brơi hăng wai lăng hră Căn cước kơ mơnuih lĕ hơdră pơtrun mơng Kơnuk kơna. Ngă tui tơlơi črâo ba mơng Ding jum kông ang, khul kông ang tơring čar Daklak glăk kơtưn khul, hrơi mông mă bruă kiăng tŭ mă hră pơ-ar lăi pơthâo pơsit hră căn cước kơ mơnuih ƀôn sang hlă čip điện tử kơ mơnuih ƀôn sang pơhlôm klă hăng djơ̆ kơčăo bruă ba tơbiă.

Anom ngă hră pơ-ar Kông ang tơring čar Daklak lĕ sa amăng 18 anih anom ngă tui bruă ngă hră căn cước hlă čip điện tử amăng đơ đam tơring čar. Hăng 3 grŭp hyu mă bruă, pơpha jing 3 tal: mơguah – čơtlăm – mơmot, mơng 7 mông mơguah truh 10 mông mơmot, rim hrơi tŭ mă năng ai ñu 600 pok hră pơ-ar mơng mơnuih ƀôn sang nao ngă hră căn cước. Hrơi mông mă bruă đĭ truh 15 mông amăng sa hrơi pơ ala kơ 8 mông sa hrơi kah hăng hlâo adih hmâo ngă gal brơi kơ mơnuih ƀôn sang nao lăi pơthâo pơsit hră. Ơi Y Dhêč Kbuôr, sa čô mơnuih ƀôn sang ƀơi Buôn Ako Dhông, phường Tân Lợi, plơi prong Buôn Ma Thuột nao mă bruă amăng yang hrơi dŏng brơi thâo:

“Ƀing kông ang hur har pran jua biă kiăng hmao brơi kơ hrơi mông kiăng yua, rơnoh bruă pơsit hră căn cước kơ mơnuih ƀôn sang. Hăng pran jua gơgrong prong tui anun, ƀing gơmơi ăt ƀuh mơ-ak mơn yua kơ lom rai pơ̆ anai dưi ngă tañ rơguăt. Hăng hrơi mông tui anai kâo ƀuh pran jua mă bruă bơhmu hăng bruă mă lĕ lu biă laih”.

Kông ang Daklak djru klă mơnuih ƀôn sang ngă hră căn cước mơnuih ƀôn sang 

Ơi Kiều Văn Trầm, Kơ-iăng Khua Anom bruă Tơhan polis wai lăng hră pơ-ar gah hơđong mơnuih mơnam Kông ang tơring čar Daklak brơi thâo, hrom hăng đĭ tui giăm truh dua wot hrơi mông mă bruă rim hrơi hăng mă bruă 7 hrơi amăng sa rơwang hrơi tơjuh, gơnong bruă Kông ang dô̆ pơkiăo nao mơnuih apăn bruă mă bruă klă, hmâo tơlơi găn rơgao nao pơ̆ anom bruă djru mơnuih ƀôn sang ngă hră pơ-ar pơsit brơi hră căn cước mơnuih ƀôn sang. Khă hnun hai yua kơ anih anom prong, mơnuih ƀôn sang dô̆ hơdĭp raih daih hui, mrô măi mok ƀu lu anun bruă pơsit hră căn cước dô̆ bưp lu tơlơi tơnap. Ƀơi anăp tơlơi kiăng lu mơng bruă, Kông ang tơring čar Daklak ba tơbiă pơđĭ tui mông mă bruă truh 19 mông amăng sa hrơi hăng pơdŏng dong hơdôm grŭp mă bruă đuăi hyu tơl kual asuek, ataih:

“Kiăng gal brơi kơ neh wa ƀơi kual asuek, ataih nao ngă hră căn cước, ƀing gơmơi hmâo pok pơhai khul mơnuih pơhrui pơsit ƀơi hơdôm bôh să, phường gah hơdôm bôh tơring glông, plơi prong. Mơnuih ƀôn sang ƀơi plơi pla hơpă nao pơ̆ anih čơkă mă hră pơ-ar pioh ngă tui kiăng giăm ƀiă. Hrom hăng anun hmâo tơlơi soh čih anăn păn thơ kông ang să, phường pơsit, pơhrua nao mơtăm kiăng neh wa ngă tui amuñ ƀiă. Dua lĕ, ră anai hơdră pơtrun mơng ƀing gơmơi đing nao ngă ƀơi hơdôm anih hơpă hmâo lu mơnuih ƀôn sang hlâo, tơhrơi ngă ƀơi anih ataih, mlăm ngă ƀơi anih giăm. Mơng ră anai truh lơ 30/6 abih bang hơdôm mơnuih leng kơ dưi ngă hră căn cước ƀơi anih pô dô̆”.

Truh lơ 30/6 Kông ang Daklak ngă giong giăm truh 1 klăk 200 rơbâo hră căn cước mơnuih ƀôn sang    

Tui hăng mrô yap, đơ đam tơring čar Daklak hmâo năng ai ñu 1 klăk 500 rơbâo čô mơnuih djop tơlơi dưi pơsit hră căn cước. Truh mông anai, Kông ang tơring čar hmâo pơhrui mă laih 70.000 hră pơ-ar mơ-ĭt kơ Ding jum kông ang pơsir pơsit pơplih hră. Tui kơčăo bruă truh lơ 30/6 Kông ang tơring čar Daklak ngă giong giăm hmâo 1 klăk 200 rơbâo hră căn cước (tui tơhnal pơkă ƀiă biă mă ñu 70% mơ̆ Ding jum kiăng). Tui anun, hơnong ñu rim hrơi khom pơhrui mă năng ai ñu 9.600 pok hră pơ-ar. Hăng pran jua gơgrong prong mơng khul kông ang, mơnuih ƀôn sang amăng tơring čar đăo gơnang bruă pơsit hră căn cước amra ƀrư̆ hrơi gêh gal hloh hăng ngă giong djơ̆ rơnoh ba tơbiă.

Thượng tá Tô Anh Dũng, Kơ-iăng Khua Anom Tơhan polis wai lăng hră pơ-ar gah hơđong mơnuih mơnam, Ding jum kông ang brơi thâo: Tơdơi kơ Tơlơi phiăn Căn cước mơnuih ƀôn sang dưi hmâo Khua git gai wai lăng pơ ala mơnuih ƀôn sang pel ĕp, Ding jum kông ang hmâo pơphun lu bruă pơplih pơkra, pơsit pơkra, pơsit hăng wai lăng hră kak mơnuih ƀôn sang hơdai nao hră căn cước mơnuih ƀôn sang. Glông bruă hră căn cước dưi tô nao rai, lăi pơthâo, mă yua, djru bruă ba glăi bôh tơhnal amăng bruă wai lăng kơnuk kơna, tơlơi rơkâo bruă mă mơng gơnong bruă kông ang.

“Hlâo adih ngă hră kak mơnuih ƀôn sang lĕ hmâo bruă mă kru tơngan glăn pơ ala kơ kru rŭp čơphin. Yua anun ƀing gơmơi hmâo prăp lui kơ bruă pơhrăm pioh kơ 63 bôh tơring čar ƀơi Đại học Bách Khoa hăng C06 amra gơgrong hlâo hmâo kông điện mơ-ĭt  kơ kông ang hơdôm bôh anih anom kiăng ƀing gơñu čih anăn mơnuih apăn bruă tơhan, tơhan pioh ƀing gơmơi hmâo kơčăo bruă pơhrăm brơi”.

Bruă pơkra, pơsit hăng wai lăng hră kak mơnuih ƀôn sang hơdai nao hră căn cước lĕ hơdră pơtrun mơng Kơnuk kơna. Ding jum prăk kak hmâo mă yua laih tơlơi lăi pơhing kơ bruă pơhrŏ trun prăk apah ngă hră căn cước. Kiăo tui anun, abih bang mơnuih dêh čar Việt Nam djop 14 thun hăng lu hloh kơ 14 thun lom nao ngă pơ-ar pơplih, pơsit glăi hră Căn cước, pơplih mơng Hră kak mơnuih ƀôn sang 9 mrô, 12 mrô jing pơsit hră Căn cước ăt dưi pơhrŏ trun mơn ha mơkrah rơnoh prăk ngă hră bơhmu hăng tơlơi pơkă hlâo adih. Ră anai, gơnong bruă Kông ang hơdôm anih anom pơtrut tañ rơnoh Rơwang bruă pơsit hăng wai lăng hră căn cước mơnuih ƀôn sang./.

VOV Tây Nguyên: Pô čih – Siu H’ Prăk: Pô pơblang