VOV4.Jarai - Grŭp hyu mă bruă mơng Ding jum Khul ling tơhan dêh čar ta yua kơ Trung tướng Phùng Sĩ Tấn, Kơ-iăng Khua pơphô bruă Khul ling tơhan mơnuih ƀôn sang dêh čar Việt Nam ngă Khua grŭp hmâo nao čuă, mă bruă hăng Jơnum min mơnuih ƀôn sang tơring čar kơ bruă pơsir anih anom mă yua kơ rơwang bruă jơlan Trường Sơn Đông ƀơi tơring čar Daklak. Rơwang bruă jơlan Trường Sơn Đông găn tơring čar Daklak hmâo rơwang ataih rơbêh kơ 126 km. Truh ră anai, hmâo pơkra giong laih, pel ĕp jao laih 52 km jơlan nao rai. Thun 2020, pok pơhai pơkra 13 anung prăk pioh pơkra. Khă hnun hai, yua kơ bơdjơ̆ nao mơng bruă pơsir anih anom mă yua pơkra anun sa dua anung prăk ƀơi tơring čar kaih hĭ rơnoh bruă. Amăng mông mă bruă, Trung tướng Phùng Sĩ Tấn rơkâo Khua tơring čar Daklak đing nao, črâo ba hơdôm ƀirô apăn bruă gum hrom kơjăp hăng Grŭp wai lăng rơwang bruă pơtrut tañ hơdôm hră pơ-ar, rơnoh pơsir anih anom mă yua, bruă man pơkra. Khua Jơnum min mơnuih ƀôn sang tơring čar pơsit amra ngă brơi kiăng rơwang bruă ngă tui djơ̆ kơčăo bruă; pơsit anai lĕ tơlơi kiăng klă pioh tơring čar pơđĭ kyar bơwih ƀong – mơnuih mơnam pơkĕ hăng hơkrŭ bruă pơgang lŏn ia – rơnuk rơnua plơi pla./.  

Siu H’ Prăk: Pô pơblang